Një i vdekur dhe 21 të plagosur pas përleshjes me armë zjarri në Prishtinë

Një person ka vdekur dhe katër të tjerë janë plagosur si pasojë e një përleshjeje me armë zjarri në qendër të Prishtinës mesnatën e së premtes, njoftoi Policia e Kosovës.

Policia, raporton RFE, tha se gjatë incidentit janë lënduar edhe 17 persona të tjerë nga copëzat e thyerjes së gotave dhe shisheve të qelqit, pas një mosmarrëveshjeje mes disa burrave në lokalin “Bon Vivant” në orët e vona të 4 gushtit.

“Dyshohet se pas një mosmarrëveshje në një lokal, në mes të disa të dyshuarve meshkuj kosovarë, janë përdorur edhe armë zjarri (të shtëna me armë zjarri)”, thuhet në njoftimin e Policisë.

Shërbimi Spitalor Klinik dhe Universitar i Kosovës, SHSKUK, konfirmoi vdekjen e një burri 39-vjeçar, si pasojë e plagëve të rënda.

“Përkundër përpjekjeve maksimale nga stafi mjekësor një person i datëlindjes 1984, ka ndërruar jetë në Mjekimin Intensiv Qendror”, njoftoi SHSKUK.

Të gjithë të plagosurit e tjerë nga ky incident janë jashtë rrezikut për jetë, tha SHSKUK.

Sipas policisë, katër të dyshuarit mbeten të hospitalizuar në Qendrën Klinike dhe Universitare të Kosovës, QKUK, dhe me vendim të prokurorit ndalohen nën përkujdesje të policisë.

“Në vendin e ngjarjes kanë dalë njësit relevante policore dhe njësia K-9, në vend-ngjarje janë gjetur katër gëzhoja dhe njolla gjaku”, thuhet tutje në njoftim.

SHSKUK njoftoi se pesë persona janë pranuar për trajtim të mëtejmë, pas ndihmës mjekësore emergjente në Klinikën Emergjente, si pasojë e lëndimeve që kanë marrë mbrëmë.

Prej tyre, raporton RFE, katër janë pranuar për trajtim të mëtejmë në Klinikën e Ortopedisë dhe 1 në Klinikën e Kirurgjisë Vaskulare.