Një objekt i paidentifikuar futet në Poloni, Ushtria polake: Erdhi nga Ukraina!
Një objekt i paidentifikuar ajror u fut mëngjesin e sotëm në hapësirën ajrore të Polonisë, anëtare e NATO-s, nga drejtimi i kufirit me Ukrainën, ka bërë të ditur Komanda Operative e Ushtrisë së Polonisë.
“Nga momenti i kalimit të kufirit deri te zhdukja e sinjalit ai u vëzhgua me radarët e mbrojtjes kundërajrore,” thekson Komanda Operative përmes rrjetit social X.
Televizioni polak TV Republika raporton se kërkimi për objektin e paidentifikuar vazhdon në afërsi të qytetit Hrubieszow në jug të Polonisë. Agjencia e lajmeve Reuters raporton se nuk arriti që ta konfirmoj menjëherë këtë informacion.
“Në përputhje me procedurat në fuqi, Komandanti operativ i Forcave të Armatosura ka mobilizuar forcat në dispozicion dhe mjetet të cilat aktualisht i ka në dispozicion.”
Ndryshe, gjatë natës Rusia ka kryer sulme ajrore ndaj Ukrainës me 158 dronë dhe raketa, në sulmin më të madh ajror që nga fillimi i pushtimit, duke gjuajtur infrastrukturën kritike, industrinë dhe objektet ushtarake, ka bërë të ditur Ushtria e Ukrainës.
