Nxori kokën, Lavrov: Situata në Kosovë mund të provokojë konflikt të ri në Evropë!

Pas simboleve “Z” me të cilat protestuesit serb mbuluan makinat e KFOR-it dhe ato të Policisë së Kosovës, u shfaq dhe shefi i diplomacisë së agresorit që inskenoi tensionet në Kosovë, Sergey Lavrov, duke e vlerësuar situatën e sigurisë në Kosovë si alarmante dhe se mund të provokojë një tjetër konflikt në qendër të Evropës.

“Një shpërthim i madh po përgatitet në qendër të Evropës, pikërisht në vendin ku, në vitin 1999, NATO sulmoi Jugosllavinë, duke shkelur çdo parim të imagjinueshëm të Aktit Final të Helsinkit dhe të dokumenteve të OSBE-së,” tha sot Ministri i Jashtëm i Rusisë, Sergey Lavrov, gjatë një vizite në Kenia, raporton Agjencia shtetërore ruse, RIA Novosti.

Aktualisht në Zubin Potok protestuesit janë shpërndarë për tu rikthyer nesër ndërsa ata në Zveçan dhe Leposaviç të inkurajuar tashmë nga prezenca e ushtrisë serbe në kufirin Kosovë-Serbi vazhdojnë me tensionet ndërsa Lavrov thotë se kjo situatë kërkon një zgjidhje gjeopolitike që do të garantonte sigurinë e vendeve evropiane ndërsa përfundon:

“Asnjë bllok, përfshirë NATO-n, nuk ka të drejtë të pretendojë dominim në atë pjesë të planetit”.

Ndryshe, sot, përkundër përpjekjeve të SHBA, BE dhe KFOR-it për të shtensionuar situatën, dy autoblindat e Njësisë Speciale të Policisë së Kosovës u larguan por jo dhe protestuesit me kriminelin Goran Rakiç të cilët në makinat e KFOR-it firmosën pushtimin rus të veriut të Kosovës për të vazhduar me “Z” edhe mbi makinat e Policisë së Kosovës.

Ndërsa mbi makinat e mediave kishin mesazhin special, atë kishtar me katër S, i cili figuronte mbi çdo masakër të realizuar nga forcat serbe në vitin 1999 dhe jo vetëm, në Kosovë.

Pas këtij akti kriminale ka reaguar Asociacioni i Gazetarëve të Kosovës duke raportuar për tentim-sulme kundër disa gazetarëve në veri të Kosovës, ku grupe serbësh lokalë janë duke protestuar sot kundër kryetarëve të rinj shqiptarë të komunave Zveçan, Zubin Potok dhe Leposaviç.