“O Lul, o hero, krejt Shqipëria ty të do!”

Metamorfoza e demokracisë shqiptare

Ishte 21 Marsi i këtij viti kur Lulzim Basha tha se ka dhënë dorëheqje nga kreu i Partisë Demokratike, fakt me të cilin nuk arritën të bindin askënd si ai ashtu dhe ata që ngelën nën komandën e tij, për ta çuar deri në fund misionin e Sigurimit të Shtetit për shkatërrimin e PD.

Kështu era Lul dhe Bashë kundërmoi dje në parlament ndonëse ai nuk ishte në këtë tempull landfilli, kur Kryeministrit Edi Rama iu kërkua për të disatën herë  “të bëhet burrë”!

Dje kjo kërkesë nuk doli nga goja e Lulit por i komanduari i tij ama në sytë e deputetëve që i la amanet Edi Ramës, përveç shkëlqimit kur dëgjuan mesazhin e dal nga goja e Lulzim Bashës edhe me 21 Tetor të vitit 2021, mund të lexohej edhe synimi i mirënjohur i demokracisë shqiptare duke shitur metamorfozën me gërthitjen tashmë të sloganit: “O Lul, o hero, krejt Shqipëria ty të do”.

Kjo tufë e paaftëve që garantuan me shumë sukses ripushtimin komunist dhe rivendosjen e diktaturës duke mos tradhtuar idetë e Lulzim Bashës, nuk janë një copëz e shkëputur e popullit shqiptarë! Janë trashëgimtar të po atyre “demokratëve” që kërkonin rrëzimin e Enver Hoxhës për 40 vjet dhe kur ai vdiq, miratuan vendimin e Sigurimit të Shtetit që diktatori i radhës duhet të jetë Ramiz Alia ndërsa vazhduan të kenë frikë nga Enver Hoxha i vdekur!

Kur Sigurimi i Shtetit propagandoi se ra komunizmi këta sërish përqafuan këtë arritje të madhe demokratike shqiptare ndonëse demokracinë filluan ta ndërtojnë, cekat me çifteli!

Shpresë për këtë masë të madhe njerëzish që u përdor ishte biri i popullit që nuk vinte nga radhët e kriminelëve komunist, nga ku filloi të dëgjohet dhe slogani “O Azem, o hero, krejt Shqipëria ty të do”. Sa më i zëshëm ishte ky slogan aq më e madhe ishte nevoja për metamorfozën e atyre që ishin dakord me idetë pluraliste që dita ditës po artikuloheshin nga një përvojë e pastër shqiptare duke mos shpërfillur sigurimsat nëpër këmbë.

Gjithsesi, duhej një lider, u morën përgjegjësitë dhe slogani dyzohej jo pa qëllim në mes të ai që konsiderohej bir i popullit dhe atij që vinte nga radhët intelektuale dhe kishte një zë ndryshe “O Sali, o hero, krejt Shqipëria ty të do”!

Kjo turmë, nuk pengohej kur dëgjohej ndër popull “O Azem…” ose “O Sali” por gjithmonë ishin aty për  tu bezdisur kur Sigurimi i Shtetit vlerësonte se Azemi duhej të përplasej me Saliun dhe e kundërta, sepse thjeshtë PD nuk duhet të rritet dhe të ec përpara!

Dhe, çuditërisht ishte po ky Sigurim i cili e vendoste se kë “…krejt Shqipëria e do” dhe zhvillimet demokratike nuk kishin kurrfarë roli!

Kjo u konfirmua me ecjen e përshpejtuar të Shqipërisë përpara, dhe aty ku zhvillohej më shumë partia meritore për këtë zhvillim humbte vota në mënyrë të frikshme!

Teoritë politike ose hipotezat e Kisingerit do ti rrëzoj Sigurimi i Shtetit në çdo moment kur investimet ishin të dukshme, për të mos thënë të tepruara! Në terma konkret nga vitet e fundit të qeverisjes së jo komunistëve, kemi Tunelin e Elbasanit ose shtrimin e të gjitha rrugëve rurale të Beratit, të cilat projekte jo vetëm që nuk prodhuan një avancim në mbështetjen popullore për të hapur rrugët e zhvillimit të mëtejmë të zonës, por dënuan qeverinë e cila u mundësoi një jetë shumë herë më të mirë.

Dhe, anëtarësimin në NATO, që mburrje edhe sot kujtohet nga qeveria e Kroacisë sepse mundësoi zhvillimin e turizmit në një shtet tashmë me siguri ndryshe si pjesë e Aleancës Veriatlantike; Për dallim nga Shqipëria, ku rivalët demokratë me zë propagandonin se “NATO nuk të jep bukë”!

Për të ardhur në realitetin e hidhur që po përjetojmë ditët e sotme, kur është po ky Sigurim i Shtetit i cili po vendos se kush është parti në pushtet dhe kush është opozitë, dhe kur i duhet thënë Kryeministrit “të bëhet burrë”!

“O Lul, o hero, krejt Shqipëria ty të do” mund të konsiderohet metamorfozë e demokracisë shqiptare nga Sigurimi i Shtetit por jo dhe nga demokratët që pas 22 vjetëve iu tha se ndryshimi do të vijë por jo me Saliun, vetëm me Lulin!

Pavarësisht se ishte e qartë se çfarë metamorfoze e demokracisë shqiptare kishte ndodhur për këto dy dekada, me kalimin e viteve ishte e qartë se cili ishte roli i liderit të ri dhe pse artikulimi i sloganit tashmë të ndryshuar kishte rëndësi kur ishte më i zëshëm!

Sa më i zëshëm ishte fakti “O Lul, o hero, krejt Shqipëria ty të do” aq më i fortë ishte pushteti i Edi Ramës dhe aq më e qartë ishte metamorfoza e demokracisë shqiptare që po çonte duart në shenjë dorëzimi përballë një regjimi që nuk kishte vetëm trajtë por edhe fuqi totalitare.

Çuditërisht, në momentin kur ndër shqiptarë normal ra besimi për Lulzim Bashën si lider i PD dhe nuk e nxirrnin dot nga goja sloganin “O Lul, o hero, krejt Shqipëria ty të do”, Sigurimi i Shtetit nuk mori masa për të dëshmuar vlerat e këtij lideri të ri që u shit si properëndimor dhe proevropian, por filloi sulmin ndaj ish-liderit tashmë edhe të shtyrë në moshë që po fitonte terren në kthimin e tij në krye të partisë.

Demokratët filluan të dëgjojnë atë që e kishin dit me kohë se ai kishte teserë partie komuniste, se ai kishte takuar diktatorin Enver Hoxha deri tek realiteti i ri që prek pronën e shqiptarëve, votimin e Ligjit 7501!

Votimi i Ligjit 7501, tregon dhe cila është metamorfoza e demokracisë dhe kush janë këta që i kërkojnë Edi Ramës “të bëhet burrë” ndërkohë i mundësojnë të bëhet diktator!

Kundër Ligjit 7501 publikisht ishte vetëm Azem Hajdari dhe u pëlqen ose jo komunistëve ai vërtetë është heroi i demokracisë; Por, kujdes, kur Ligji iu nënshtrua votimit, në parlamentin me 250 deputetë ku 170 ishin nga PS,  75-PD dhe 5 – Omonia, fillimisht nga goja e Nënkryetarit të Parlamentit, Aleksandër Meksi u dëgjua rezultati: “106 vota për, 52 kundër, 19 abstenime. Ky votim ishte i nenit 2 dhe njëkohësisht, ishte dhe për miratimin në parim të Ligjit sipas këtij parimi bazë. Kalon ligji në parim.” Sikur edhe votimi i dytë të quhet i rregullt, pas ankesave të PD, sërish vetëm 158 ishin për, 13 kundër dhe 24 abstenime!

Shumë vite kaluan dhe pavarësisht numrit të votave, Sali Berisha e pranoi se PD ishte për miratimin e këtij Ligji, që nga deputetët e Lul Bashës që amanet i ka Edi Rama konsiderohet mëkat i madh!

Jo mëkati, që pa diskutim është shumë i madh, por akuzuesit japin pasqyrën reale të metamorfozës së demokracisë shqiptare.

Ditë më parë, po këta deputetë i dhanë votat Bordit pesë anëtarësh të Autoritetit për Informim mbi Dokumentet e Ish-Sigurimit të Shtetit, 3 prej të cilëve janë komunistë, pasardhës të atyre që hartuan dhe bijtë dhe bijat e tyre sot i kontrollojnë këto dosje të krimit.

Dhe, që të kuptohet dora e Sigurimit është numri, nga i cili shqiptarët bezdisen shumë. Kreu i këtij Autoriteti në mandatin e kaluar, mori 105 vota nga parlamenti i sotëm me 140 deputetë, 74 prej të cilëve i ka PS!

Sa dosje janë hapur dhe si, këtë e din Sigurimi i Shtetit! Kujt i shërbejnë?! Shikoni kush është në pushtet, dhe kush po i kërkon të bëhet burrë!