O’Brien foli, Kurti: Nuk po rrezikohet partneriteti, aleati më i rëndësishëm i Kosovës, SHBA!
Pasi ndihmëssekretari amerikan i Shtetit, James O’Brien, konstatoi se Kosova e rrezikoi partneritetin me Shtetet e Bashkuara pas vendimit për ndalimin e dinarit serb ndërsa i bërë thirrje ta tërheq vendimin për dinarin, Kryeministri Albin Kurti tha sot se partneriteti nuk po rrezikohet dhe Kosova nuk ka aleat më të rëndësishëm se SHBA.
“Republika e Kosovës nuk ka partner, aleat edhe mik të rëndësishëm sikurse Shtetet e Bashkuara, kështu e konsideroj dhe bashkëpunoj unë si kryeministër i Kosovës,” tha sot Kurti në Prizren një ditë pas intervistës së O’Brien për VOA kur u shpreh se nuk bënë kërcënime të vagëta publikisht, dhe se nëse SHBA nuk trajtohet si partnere, edhe ajo nuk do ta trajtojë qeverinë e Kosovës si partnere.
Por, Kurti foli qartë dhe për pamundësinë e tërheqjes së vendimit pasi Kosova është republikë demokratike dhe nuk mund t’i mbivendoset institucioneve të pavarura si Banka Qendrore e Kosovës.
“Banka Qendrore e Kosovës ka prezantuar një plan 10-pikësh për zbatimin e Rregullores së saj. Ne jemi një Republikë demokratike. Qeveria nuk u mbivendoset institucioneve të pavarura siç është BQK-ja,” tha Albin Kurti duke vazhduar të sqarojë se nuk ka masa ndëshkuese për zbatimin e Rregullores së re të BQK-së, pasi duan të ecin përpara pa incidente, dhe pa e kontestuar aleancën me SHBA me mundësinë e cenimit të partneritetit.
“Në mesin e këtyre 10 pikave si plan pune për zbatimin e Rregullores, BQK-ja nuk ka paraparë asnjë masë ndëshkuese, pra pa ndëshkim dhe pa incidente duam të ecim përpara. Kushtetutshmëria dhe ligjshmëria janë prioritet i yni, por njëkohësisht ne kujdesemi edhe për paqe e siguri, kujdesemi edhe për mirëqenien e qytetarëve serbë!”
Ndërkohë ka sqaruar se me Rregulloren e BQK-së vetëm duan të legalizojnë dhe formalizojnë çdo transaksion financiar.
“Unë jam kryeministër që nuk dëshiron që qytetarët të kenë më pak para, por të kenë më shumë para. BQK-ja ia ka dërguar një letër Bakës Popullore të Serbisë, shpresojmë që ata të përgjigjen. Nuk është ndaluar dinari në Kosovë, bëhet fjalë vetëm për dinarin si mjet pagese, jo për dinarin që mund ta kenë qytetarët. Nuk dëshirojmë që të ndëshkojmë askënd, me kurrfarë masash mirëpo ta bëjmë këtë tranzicion ashtu që të legalizohet e formalizohet çdo transaksion financiar. Në katër komunat ekzistojnë katër dega të bankave komerciale, 15 institucione financiare jobankare. Shkëmbimi është kollaj i mundshëm,” tha Kryeministri i Kosovës i bindur se këtë Rregullore nuk e shohin si problem qytetarët serbë, por Beogradi zyrtar.
“Nuk besoj që qytetarët serbë këtë e shohin si problem, por natyrisht Beogradi zyrtar që nuk na e pranon as pavarësinë e as krimet e kryera para 25 vjetëve në Kosovë që morën përmasa të gjenocidit, është ai që sjellë këso alarmimesh para-apokaliptike. Do t’i japim kohë tranzicionit. Si për BQK-në, si për shtetndërtimin tonë demokratik, si për sistemin tonë financiar ne i jemi falënderues SHBA-së që kanë kontribuar përgjatë këtyre 25 vjetëve të Kosovës së çliruar.”
Ndryshe, Banka Qendrore e Kosovës ka miratuar një rregullore, sipas së cilës, duke filluar nga 1 Shkurti 2024, “valuta e vetme e lejuar të përdoret për kryerjen e transaksioneve të pagesave me para të gatshme dhe në sistemin e pagesave në Republikën e Kosovës është euro, si valutë e vetme edhe në kuptim të nenit 11 të Kushtetutës së Republikës së Kosovës dhe neneve 16, 17 dhe 18 të Ligjit Nr. 03/L-209 për Bankën Qendrore të Republikës së Kosovës”.
