OBSH bën thirrje për anulim të disa organizimeve për shkak të variantit Omicron

Organizata Botërore e Shëndetësisë, OBSH, u ka bërë thirrje njerëzve që të anulojnë disa plane për pushime, në mënyrë që të mbrojnë shëndetin publik, teksa varianti Omicron i koronavirusit përhapet në gjithë botën.

“Një organizim i anuluar është lajm më i mirë sesa një jetë e anuluar,” tha Drejtori i Përgjithshëm i OBSH-së, Tedros Adhanom Ghebreyesus, duke shtuar se duhet marrë vendime të vështira.

“Në disa raste, kjo gjë do të nënkuptojë anulimin apo shtyrjen e ngjarjeve.”

Deklaratat e tij kanë ardhur teksa ekspertët shëndetësorë kanë thënë se Omicron tani është variant dominues i koronavirusit në Shtetet e Bashkuara.

Shefi i OBSH-së tha se ka të dhëna se varianti Omicron është duke u përhapur shumë më shpejtë sesa Delta.

Një numër shtetesh, duke përfshirë Francën dhe Gjermaninë, raporton RFE, kanë ashpërsuar kufizimet për pandeminë dhe kanë rikthyer kufizimet në udhëtime, me qëllim të luftimit të variantit të ri.

Shtëpia e Bardhë është shprehur se presidenti amerikan, Joe Biden, nuk planifikon “të mbyllë shtetin”.