Firmoset Marrëveshja Kosovë-Danimarkë, 300 qeli për 210 mln euro
Kosova dhe Danimarka kanë firmosur një Marrëveshje bashkëpunimi për dhënien me qira të Qendrës së Paraburgimit në Gjilan me 300 qeli për 210 milionë euro, për një kohëzgjatje prej 10 viteve për shtetin danez.
“Ne konfirmojmë bashkëpunimin dhe marrëdhënien e ngushtë dhe të gjatë midis Danimarkës dhe Kosovës. Danimarka ka pasur një prani të konsiderueshme në Kosovë në të kaluarën dhe ka kontribuar në paqe-ruajtjen dhe zhvillimin demokratik të Kosovës,” thuhet në deklaratën e përbashkët e cila u firmos nga ministrja e Drejtësisë, Albulena Haxhiu dhe ministri i Drejtësisë së Danimarkës, Nick Haekkerup, duke pohuar se afërsinë historike dhe lidhjet midis dy vendeve, ndajnë një dëshirë për të forcuar edhe më tej marrëdhëniet tona bilaterale ndërsa zotohen:
“Ne jemi të përkushtuar të ndajmë vlerat e përbashkëta themelore dhe jemi të vendosur që së bashku të vazhdojmë më tej në forcimin e shtetit ligjor, demokracisë dhe të drejtave të njeriut,” thuhet në deklaratën e përbashkët të vetëdijshëm për zhvillimet e rëndësishme pozitive në veçanti në shërbimin korrektues në Kosovë, ndërsa përfundojnë:
“Ne pajtohemi që duke intensifikuar bashkëpunimin mes dy vendeve tona në këtë fushë, Kosova do të ketë mundësinë që të forcojë edhe më tej sistemin e saj korrektues.”
Në marrëveshjen e nënshkruar mes Kosovës dhe Danimarkës thuhet se Qeveria e Kosovës do t’i ofroj Mbretërisë së Danimarkës, kapacitetet e burgut, përkatësisht institucionit korrektues që gjendet në Gjilan për 300 të burgosur, për qëllimin e ekzekutimit të dënimeve daneze dhe do të bëjë rregullimet e nevojshme për çdo lehtësi për të siguruar që ai është në përputhje me ligjet dhe standardet daneze.
“Qeveria e Danimarkës synon të paguajë një tarifë vjetore për përdorimin e një burgu prej 15,000,000 euro në varësi të numrit të të burgosurve për të cilin objekti është bërë i përshtatshëm në përputhje me rregullat dhe rregulloret daneze, me një tarifë të reduktuar për 12 muajt e parë të vitit përdorimi i burgut si periudhë tranzicioni. Qeveria e Danimarkës synon gjithashtu të paguaj një tarifë fillestare prej 5,000,000 euro për të mbuluar periudhën e tranzicionit derisa burgu të jetë përfunduar dhe plotësuar me personel. Këto tarifa do të mbulojnë të gjitha kostot që lidhen me një marrëveshje të tillë”, thuhet në Marrëveshje.
“Kemi kërkuar ndihmë nga disa vende për ta zgjidhur këtë problem, por Kosova ka qenë vendi i parë që ka reaguar pozitivisht ndaj kërkesës sonë dhe është angazhuar pozitivisht më pas në dialog për këtë çështje”, tha Ministri i Drejtësisë i Danimarkës, Nick Hakkerup, duke shtuar se qendrat e paraburgimit që merren me qira nga Kosova do të menaxhohen sipas ligjeve të Danimarkës.
“Menaxhimi do të jetë nën lidershipin e autoriteteve të Danimarkës, por do të ketë trajnim edhe për stafin vendas. Danimarka do të respektojë të gjitha ligjet sa i përket sistemimit dhe trajtimit të të burgosurve,” tha Nick Hakkerup duke vlerësuar marrëveshjen e sotme si një gurthemel për marrëveshjet e ardhshme.
Ndërsa ministrja kosovare e Drejtësisë, Albulena Haxhiu, tha se ky është vetëm hapi i parë drejt jetësimit të Marrëveshjes finale, e cila për të hyrë në fuqi duhet të ratifikohet në Kuvendin e Kosovës me dy të tretat e votave, sepse kështu kërkohet për marrëveshjet ndërkombëtare.
Ndryshe, ndërsa debati rreth kësaj marrëveshje, praktika të tilla janë zbatuar edhe më parë, ku dihet rasti i Holandës e cila i kishte dhënë me qira qeli burgu Norvegjisë dhe Belgjikës.
Ja dhe Marrëveshja e plotë:
