Opozita: Moratorium për gjyqtarët e Kolegjit Zgjedhor, Gjiknuri: Nuk mund të bllokohet vettingu!
Sot Partia Demokratike propozoi në Këshillin Politik të Reformës Zgjedhore që gjyqtarët, pjesë e Kolegjit Zgjedhor, të përjashtohen nga vettingu deri në mbarimin e mandatit të tyre 4- vjeçar me arsyetimin se janë nën presion dhe nuk mund të marrin vendime të paanshme për ankimimet në zgjedhje. Por përfaqësuesi i Partisë Socialiste në këtë organizëm të Reformës Zgjedhore, Damian Gjiknuri, shprehet se nuk mund të bllokohet procesi i vettingut për shkak të ngritjes së Kolegjit Zgjedhor, kur nga ana tjetër mund të përzgjidhen gjyqtarë që kanë kaluar vettingun.
”Nuk duket normale që procesi i vettingut të bllokohet për shkak të formimit të Kolegjit Zgjedhor. Do ishte e arsyeshme që ata që kanë kaluar vettingun të jenë pjesë e saj dhe gjithashtu të zgjerohet edhe shkalla. Nuk mundet PD të vendosë në pikëpyetje Reformën në Drejtësi dhe ato çfarë kemi arritur. Po ata që kanë kaluar vettingun, madje unë dua të pakësohen anëtarët e Kolegjin Zgjedhor por s’dua që të mbaj qëndrime sepse jemi në negociata. Shpresoj që opozita brenda javës tjetër të sjellë të gjitha propozimet dhe shqetësimet që më pas koha të shfrytëzohet për kompromise,” tha Gjiknuri.
Ndërkohë përfaqësuesi i Partisë Demokratike, Oerd Bylykbashi, tha pas takimit se në mbledhjen e sotme ka pasur përplasje dhe reagime të ashpra. Bylykbashi e pranoj se mazhoranca nuk e ka pritur mirë propozimin e opozitës për moratorium për gjyqtarët e Kolegjit Zgjedhor por shtoi se kjo është thelbësore, në mënyrë që shqiptarët të kenë një gjykatë të paanshme, të pavarur dhe funksionale.
“Sot opozita bëri propozimin e paketës tjetër në reformën zgjedhore, në përputhje me kalendarin. Opozita ka propozuar 6 paketa dhe në ditët në vijim do jetë edhe një tjetër për financimin e partive. Propozimi i sotëm ishte themelor, e drejta për t’iu drejtuar një gjykate të paanshme dhe të pavarur. Raporti i OSBE/ODIHR konstaton se si nën presionin politik nga Vettingu, Gjykata e Posaçme ishte gjysmake, në periudhën zgjedhore, dhe nën presionin e Vettingut, e për rrjedhojë nuk ishte e paanshme dhe e pavarur.
Duke qenë se pa një garanci, procesi zgjedhor nuk mund të jetë kurrë i pavarur, kjo paketë është thelbësore për të arritur kompromisin në Reformën Zgjedhore. Pati reagim shumë të fortë nga mazhoranca, e cila do të vazhdojë të kontrollojë mekanizmat, me të cilat kapin gjyqësorin. Ne këtë nuk do ta lejojmë. Është një proces, që është thelbësisht problematik, ju keni rastin e Dvoranit, që nuk justifikon 100 milionë lekë dhe askush nuk u kujtua ta ankimonte atë vendim të turpshëm dhe sot kemi këtë situatë,” përfaqësuesi i PD në Këshillin Politik për Reformën Zgjedhore duke përfunduar:
“Ne propozojmë që të gjithë ata gjyqtarë që nuk i janë nënshtruar procesit të Vettingut, dhe ata që nuk janë zënë në kurth, të jenë gjyqtarët që të zgjidhen me kurth. Në fund të procesit, ata t’i nënshtrohen të gjitha rregullave të Vettingut, në mënyrë që të jenë të pastër. Pra, propozimi ynë nuk i heq të drejtën asnjë të korruptuari për të dalë para drejtësisë.”
Ndryshe,në zbatim të rekomandimit prioritar të ODIHR-it për të nxjerrë jashtë presionit të vetingut gjykatën që do të vendosë për ankesat e procesit, sot në Këshillin Politik të Reformës Zgjedhore opozita ka paraqitur një draft ligjor.
Këshilli Politik i Reformës Zgjedhore përbëhet nga dy bashkëkryetarët e Komisionit Parlamentar, Damian Gjiknuri dhe Rudina Hajdari, si dhe nga përfaqësuesit e opozitës, Oerd Bylykbashi dhe Petrit Vasili.
