“Oppenheimer” mbizotëron çmimet Oscar

“Oppenheimer”, një film që ka të bëjë me garën se kush e ndërton bombën e parë bërthamore, i ka fituar shtatë çmime Oscar, përfshirë çmimin kryesor për filmin më të mirë, gjatë një ceremonie në Los Anxhelos.

Ky film, raporton RFE, ishte i nominuar për 13 çmime Oscar.

Aktori irlandez, Cillian Murphy, e fitoi çmimin për aktorin më të mirë për rolin e tij në këtë film, ku e luajti fizikanin teorik, J. Robert Oppenheimer, i cili ishte lideri i përpjekjeve amerikane në vitet ’40 për ta krijuar një armë e cila do t’i jepte fund Luftës së Dytë Botërore.

Regjisori i “Opppenheimer”, Christopher Nolan, e fitoi çmimin për regjisorin më të mirë.

“Ne e bëmë një film për njeriun i cili e krijoi bombën bërthamore, dhe ne po jetojmë në botën e Oppenheimerit qoftë për mirë apo për keq”, tha Murphy pasi e mori çmimin e aktorit më të mirë.

“Këtë çmim do të doja t’ua kushtoja paqebërësve kudo”, shtoi ai.

Drama historike, që zgjat tri orë, rreth shkencës dhe politikës, “Oppenheimer” u bë hit dhe i fitoi 953.8 milionë dollarë, si dhe mori lëvdata të mëdha nga kritikët.

Ky ishte filmi i parë me të cilin Nolani fiton Oscar për filmin më të mirë.

Emma Stone e fitoi çmimin për aktoren më të mirë për rolin që e luajti si një grua e ngjallur nga të vdekurit në komedinë “Poor Things”.

“Kjo është vërtet e jashtëzakonshme”, tha Stone.

Për disa kjo ishte natë historike, pasi Ukraina e fitoi Oscarin e parë për dokumentarin më të mirë: “20 Days in Mariupol”, ndërsa Britania e Madhe e fitoi Oscarin për filmin më të mirë ndërkombëtar: “The Zone of Interest”.

Robert Downey Jr. nga “Oppenheimer” dhe Da ‘Vine Joy Randolph nga “The Holdovers”, raporton RFE, fituan çmime si aktorët më të mirë në rol dytësor.

Ndryshe, filmi “Oppenheimer” ishte fituesi më i madh i çmimeve të Globit të Artë në fillimjanarin e këtij viti, duke fituar pesë çmime përfshirë këtu dhe çmimin kryesor.