Reshje dhe erë e fortë, Autoriteti Portual Durrës: Pritet përmirësimi i motit dhe rikthimi në normalitet

Reshjet dhe era e fortë kanë bërë që të anulohen linjat e trageteve Brindisi-Vlorë-Brindisi si dhe Durrës-Bari-Durrës, pas pezullimit të lundrimi për anijet e peshkimit.

Sot Autoriteti Portual Durrës raporton se  Gjiri i Durrësit vijon të jetë i ndikuar nga kushte të paqëndrueshme, shoqëruar me reshje dhe erë të fortë, por që në orët në vijim pritet përmirësim i kushteve të motit dhe rikthimin gradual në normalitet edhe për mjetet e vogla lundruese dhe ato të peshkimit.  

Ndërkohë mësohet se në mbrëmje pritet të nisen dhe tragetet Durrës-Bari-Durrës! 

“Gjiri i Durrësit vijon të jetë i ndikuar nga kushte hidrometeorologjike të paqëndrueshme, shoqëruar me reshje dhe erë të fortë me drejtim Jug-Jug-Lindje, Jug-Jug-Perëndim dhe shpejtësi që ka variuar nga 24-45 m/s, çka ka bërë që mbrëmjen e kaluar të mos ketë lundrim të trageteve nga Durrësi drejt Barit dhe anasjelltas,” shprehet Autoriteti Portual Durrës duke siguruar se referuar udhëzimeve nga autoritet detare janë marë masat për sigurimin e mjeteve lundruese që ndodheshin të akostuara në kalatat e portuale, me qëllim shmangien e çdo avarie ndërsa përfundon:

“Në orët në vijim pritet përmirësim i kushteve të motit dhe rikthimin gradual në normalitet edhe për mjetet e vogla lundruese dhe ato të peshkimit.”