Osmani-Gjukanoviç, Kosova dhe Mali i Zi kundër Ballkanit të Hapur

Kosova dhe Mali i Zi janë kundër nismës “Ballkani i Hapur” u shprehën Presidentët Vjosa Osmani dhe Milo Gjukanoviç pas takimit në Prishtinë ku u tha se biseduan për të gjitha çështjet që kërkojnë zgjidhje e ku nuk u përjashtua as demarkacioni.

“Sikurse deklaroi edhe presidentja Osmani, jemi të vetëdijshëm se kjo është një çështje e ndjeshme, që duket si problematike, për disa që dëshirojnë të krijojnë probleme, por që për ne nuk konsiderohet e tillë, ngase kemi komisionet tona për të kryer ashtu si duhet, që të mos shndërrohet si burim i problemeve,” tha Milo Gjukanoviç dhe ndryshe nga Kryeministri Dritan Abazoviç i cili tha se demarkacioni ka marrë fund, sqaroi se përmes Komisionit të përbashkët do t’i japin hapësirë çfarëdo dileme të mundshme. 

“Kemi folur edhe për çështjen e kufirit, kemi marrëveshjen të nënshkruar në vitin 2015, po ashtu kemi edhe Deklaratën e përbashkët të dy Presidentëve në vitin 2018 dhe të njëjtat janë miratuar në parlamentet e dy vendeve. Kjo çështje mund të konsiderohet problematike vetëm për ata që dëshirojnë probleme. Megjithatë si dy vende mike, përmes punës së përbashkët të komisionit do t’i japim mundësi çfarëdo korrigjimi.”

Çështje e pashmangshme ishte dhe “Ballkani i Hapur” me dy qëndrime kundërthënëse që u dëgjuan nga Presidenti dhe Kryeministri i Malit Zi si në rastin e demarkacionit por si Gjukanoviç ashtu dhe Osmani sqaruan arsyet e mospjesëmarrjes së tyre në këtë nismë, duke theksuar njëherazi se duhet kushtuar kujdes aspektit ekonomik që të dy vendet të jenë atraktivë në ofrimin e kushteve për investime nga ndërkombëtarët.

“Ky orientim parimor nuk do të thotë se jemi symbyllur për nismat tjera, por jemi për nismën e Berlinit, që është komplementare në rrugën tonë drejtë BE-së,” tha Presidenti i Malit Zi duke saktësuar se “Ballkani i Hapur” është një nismë që ka nisur në momente depresioni që kishte kapluar rajonin, kur është menduar se ka ngelur anash integrimeve evropiane.

Ndërkohë Presidentja e Kosovës nga ana e saj shtoi se edhe në takimin e G7-ës u potencua bashkëpunimi rajonal, që mbështesin proceset që çojnë në integrime drejtë BE-së.

“Duke qenë një situatë e rënduar tani pas luftës në Ukrainë, ne vazhdojmë të mbajmë qëndrimin në Kosova të vazhdojë në nismat rajonale që çojnë drejtë BE-së.”

Në konferencën e përbashkët pas takimit, Osmani dhe Vuçiç theksuan se temë e diskutimeve ishte dhe rajoni, me theks të veçantë Serbinë, si një shtet satelit i Rusisë i cili rrezikon paqen në rajon.

“Veprimet e presidentit serb, Aleksandar Vuçiç nuk janë si një ‘copy paste’ retorike e veprimeve ruse, që si qëllim që njëri shtet të determinojë fatin e shteti tjetër. Duhet ditur se jemi shtet i pavarur dhe nuk do të lejojmë që politika hegjemone ruse ta arrijë qëllimin ta destabilizojë rajonin,” tha Presidentja e Kosovës, Vjosa Osmani duke e bërë të qartë se i janë kundërvu ndikimeve ruso-serbe ndërsa përfundoi:

“Ne kemi shprehur vullnetin e popullit të Kosovës e nuk kemi pyetur dëshirën e Serbisë. I bëjë thirrje BE-së që të jetë e qartë në vlerat e saja, duke ndalur veprimet destabilizuese të Serbisë.”

Duke vlerësuar lartë kontributin e Presidentit Milo Gjukanoviç për kontributin e tij në njohjen e pavarësisë së Kosovës kontributin e tij për krijimin, zhvillimin e ruajtjen e raporteve miqësore ndërshtetërore, me këtë rast Vjosa Osmani i kërkoi dhe mbështetjen e Malit Zi për anëtarësimin e Kosovës në Këshillin e Evropës.

Pas deklaratave të Presidentëve të Kosovës dhe Malit Zi, Vjosa Osmani dhe Milo Gjukanovië, nuk ka reaguar ideatori i “Ballkanit të Hapur”, Presidenti i Serbisë, Aleksandar Vuçiç por “avokati” i tij, Kryeministri Edi Rama, duke theksuar se “Ballkani i Hapur” nuk do të ndalet!

“Kushdo është kundër Ballkanit të Hapur është në të drejtën e vet që as mos të shohë, as mos të dëgjojë dhe as mos të kuptojë se kjo nisëm nxit paqen, bashkëpunimin, integrimin dhe e përshpejton Procesin e Berlinit!” thekson Edi Rama në reagimin e tij përmes rrjetit social Twitter duke përfunduar:

“Ballkani i Hapur nuk do të ndalet sepse e ardhmja nuk ndalet dot.”