Presidentja Osmani: Uniteti, përgjigja e duhur për mbrojtjen e integritetit të Kosovës
Duke ju drejtuar Parlamentit të Kosovës me fjalimin vjetor, Presidentja Vjosa Osmani tha se uniteti është përgjigja e duhur për ta mbrojtur integritetin dhe sovranitetin e Kosovës ndërsa për draftin e statutit të Asociacionin tha se Gjykata Kushtetuese është institucioni që duhet ta bëjë vlerësimin meqë hartuesit e draftit thonë se është në harmoni me Kushtetutën
Në raport me agresionin e Serbisë ndaj Kosovës më 24 shtator, Presidentja tha se populli i Kosovës dhe përfaqësuesit e saj kanë ditur të bashkohen rreth kauzës së mbrojtjes së shtetit tonë të ndërtuar me aq shumë sakrifica.
“Në situata të tilla nuk duhet të ketë ndarje partiake e ideologjike, por duhet të ketë unitet, pa dallim. Rreshtimi i vetëm që na duhet është rreshtimi në anën e shtetit tonë të pavarur e sovran,” tha presidentja Osmani ndërsa ka falënderuar përfaqësuesit e opozitës që në këtë çështje treguan përkrahjen për institucionet e Kosovës e në veçanti për institucionet e sigurisë, të cilat vazhdojnë të jenë mbrojtësit e Republikës sonë.
“Ne jemi pak për të qenë të ndarë dhe me qëndrime të dallueshme për situata si kjo, kur vetëm uniteti është përgjigja e duhur për ta mbrojtur integritetin dhe sovranitetin e Kosovës. Këtë rrezik nuk e kemi kaluar, ndaj nuk duhet t`i nënshtrohemi ndarjes e dallimeve, por të jemi të bashkuar në vendosmërinë tonë në përballje me Serbinë e të qëndrojmë këmbëngulës dhe të palëkundur kundrejt sfidave të sigurisë.”
Për Asociacionin…
Presidentja e Kosovës tha se procesi i dialogut me Serbinë sa vjen e po bëhet më i vështirë, kjo nga jokonstruktiviteti, obstruksionet dhe përpjekjet e Serbisë që të shkaktojë destabilitet jo vetëm në Kosovë, por edhe rajon.
Ajo ka bërë të ditur se tashmë Kosovës i është dorëzuar një propozim – draft statut për një Asociacion të komunave me shumicë serbe, i hartuar nga partnerët.
“Përderisa vlerësimi i hartuesve është se një draft i tillë është në harmoni me kushtetutën, dua ta ritheksoj se institucioni që duhet ta bëjë këtë vlerësim, duke u udhëhequr nga parimi i pavarësisë e profesionalizmit, është Gjykata Kushtetuese. Është me rëndësi që të gjithë ne, pa dallim partiak, të ulemi e bashkërisht t`i përgatisim komentet tona bazuar në shqetësimet që mund t’i kemi dhe t’i dërgojmë ato në Gjykatën Kushtetuese, kurdo që ky draft të dorëzohet në këtë institucion,” tha Presidentja Osmani duke shtuar se qëllimi i përbashkët duhet të jetë të sigurohet përputhshmëri e plotë me Kushtetutën e Kosovës dhe të mos lejohet një pushtet i ndërmjetëm i qeverisjes apo anomali të tjera, të cilat rrezikojnë funksionimin e brendshëm të shtetit tonë.
“Prandaj, në mënyrë që qëllimet tona të përbashkëta të përkthehen edhe në veprime të përbashkëta, përveç konsultimeve të vazhdueshme me kryeministrin dhe kryetarin e kuvendit, kam ftuar në takim edhe liderët e partive opozitare, me qëllim që për këtë temë sfiduese, të ndërtojmë qëndrim të unifikuar e në mbrojtje të funksionimit të republikës sonë.”
Kosova nuk ka vajza e gra për të humbur
Vend në fjalimin vjetor të Presidentes së Kosovës zuri dhe përmbyllja e vitit me humbjen e shumë jetëve të grave, padrejtësisht dhe në mënyrë të dhunshme.
“Liridona Ademaj është emri që kumbon fort, si përkujtim i çdoditshëm i dhimbjes përvëluese që ngelet pas, kur padrejtësia zë vend fuqishëm. Kjo tashmë është plagë e rëndë e shoqërive anembanë botës. Nëse deri tani i referoheshim si pandemi, e vërteta është që kjo tashmë është shndërruar në tragjedinë e ditëve tona. Ta kemi të qartë njëherë e përgjithmonë, dhuna me bazë gjinore nuk është thjesht një ‘çështje e grave’, është test për njerëzimin e një krizë shoqërore që kërkon angazhimin tonë të palëkundur për ndryshim,” tha Presidentja Osmani duke e konsideruar njollë të patolerueshme në ndërgjegjen e shoqërisë sonë, dhunën me bazë gjinore.
“Duhet të fuqizohet çdo hallkë në institucionet e sigurisë e ato të drejtësisë në përballje me këtë fenomen. Në thelb, një sistem i fortë drejtësie nuk është thjesht një imperativ ligjor; është një gur themeli në përpjekjet tona më të gjera shoqërore për të çmontuar rrënjët e dhunës me bazë gjinore. Duke i mbajtur autorët përgjegjës dhe duke siguruar drejtësi për të mbijetuarit, ne hedhim themelet për një të ardhme më të sigurt dhe më të barabartë për të gjithë,” Presidentja e Kosovës e prerë edhe me këtë rast:
“E kam thënë, rithënë, e do e them sërish, Kosova nuk ka vajza e gra për të humbur”, ka nënvizuar presidentja.
Për Luginën e Preshevës…
Presidentja e Kosovës tha se anëtarësimi në NATO është prioriteti kryesor, teksa Shqipërinë e ka vlerësuar jo vetëm si shtet motër por edhe aleat strategjik të fuqishëm, i cili flet në vendet ku Kosova nuk mund të shpreh zërin e saj.
“Anëtarësimi ynë në NATO duhet të jetë prioriteti ynë numër një. Aspiratat tona për anëtarësim në aleancën më të fuqishme ushtarake janë të vendosura, të bazuara në përkushtimin tonë për sigurinë dhe stabilitetin tojë rajonal e global,” tha Presidentja e Kosovës pa harruar dhe shqiptarët e Luginës së Preshevës, për të cilët tha se ka kërkuar nga instancat ndërkombëtare reagim ndaj spastrimit etnik që po iu bëhet atje.
“Shumë nga shqiptarët e këtyre komunave janë pa shtetësi dhe pa mundësi për të realizuar të drejtat e tyre elementare. Kur jemi te shtetësia ka qenë e pafalshme që procedura për marrjen e shtetësisë së Kosovës për shqiptarët e Preshevës, Medvegjës, e Bujanocit kanë qenë të njëjta me ato që vlejnë për qytetarët që vijnë nga kontinente të largëta,” tha Presidentja e Kosovës, Vjosa Osmani, në fjalimin vjetor para Parlamentit të Kosovës duke përfunduar:
“Kam propozuar që në ligjin e ri për shtetësi, të parashihen lehtësira në procedura për marrjen e shtetësisë për bashkëkombësit tanë nga Lugina dhe shpresoj që ky propozim të përkrahet nga ju sapo të vjen në Kuvend.”
