Paga minimale/ Biznesi pro dhe kundër rritjes. Më i godituri…

Rritja e pagës minimale nga 24 në 26 mijë lekë duket se do të prekë më së shumti sektorin fason, të cilët shesin punë dhe jo produkt final, si dhe sipërmarrjen prodhuese. Megjithatë një pjesë e aktorëve të tregut thonë se rritja e pragut minimal nuk do të ketë ndikim pasi pjesa më e madhe e të punësuarve paguhen mbi këtë prag.

Biznesi fason, i cili ka si avantazh kryesor krahun e lirë të fuqisë punëtore, e quan këtë rritje si një faktor shtesë që do të ndikojë negativisht në aktivitetin e tyre. Ditën e djeshme Dhoma e prodhuesve të Veshjeve u ankua se rënia e euros dhe vonesat në rimbursimin e TVSH-së po e dëmtonin ndjeshëm aktivitetin e tyre. Ndërsa në darkë erdhi dhe njoftimi i pakonsultuar më parë për rritjen e pagës minimale.

Florian Zekja, përfaqësues i kompanive fason tha se ky vendim do të ndikojë në kostot e ndërmarrjeve. “ Ne do të duhet të ngrejmë pagat për të gjithë të punësuarit në ndërmarrjet fason dhe në të njëtën kohë do të rriten edhe pagesat për kontributet. Është një efekt domino që na vështirëson përllogaritjen e kostove në kontrata tona,”- tha Zekja  për Monitor.

Sipas Florian Zekja, kjo gangrenë do të vazhdojë derisa të rregullohet me ligj kategorizimi i punëtorëve dhe të ketë një strukturë të mirëpacaktuar të pagave sipas kategorive.

Gjergji Liqezja, administrator i kompanisë fason Shqipëria-Trikot, tha se rritja e pakonsultuar dhe në mënyrë të menjëhershme e pagës minimale nga 24 mijë në 26 mijë lekë është skandaloze.

“Nuk bëhet fjalë për vlerën 2 mijë lek me të cilën është bërë rritja por mua më intereson mënyra e të menduarit. Në të vërtetë rritja është më e lartë sepse kur ti rrit pagën rrit edhe pjesën e kontributeve që do të derdhen në arkën e shtetit si sigurime shoqërore dhe punëdhënësi duhet të paguajë edhe më shumë kontribute. Rritja është pak a shumë 2300 lekë nga lëvizja e pagës minimale çka përkthehet në rritje me 9 për qind të kostos së punës. Kjo logjikë e  të menduarit nuk është jashtë normales. Unë jam dakord që punonjësit duhet të paguhen më mirë por këtë vendim nuk mund ta marrë shteti pa u konsultuar. Pagën e vendos tregu dhe në këtë rast janë dy rritje të njëpasnjëshme që janë bërë së fundmi dhe rritja duhet të ecë edhe me logjikën e rentabilitetit të biznesit, pra nëse e pranon situata e tregut një lëvizje të tillë apo jo,”- u shpreh Gjergj Liqezja.

“Paga minimale nuk rritet me urdhra administrative, por duke krijuar mjedisin e përshtatshëm për bizneset për t’u rritur. Tregu i punës është jashtëzakonisht konkurrues, pasi ne luftojmë për të mbajtur punonjësit. Ky vendim prek më së shumti bizneset eksportuese,”- përfundoi ai.

Flamur Hoxha, administrator i kompanisë Kler, e cila qep këmisha, është i mendimit se paga duhet të vendoset nga tregu. Vendosja e këtij tavani me urdhër administrativ sjell abuzime me tregun. Tavani ka bërë që ekonomia të marrë minimumin e mundshëm.

Në 4-5 vitet e fundit nuk ka pasur rritje page, kjo do të jetë një kosto ekstra. Për kompanitë fason, rritja e pragut të pagës minimale do të jetë shqetësim. Mbase ky vendim po merret në këtë moment për të mbushur gropën në  fondet e pensioneve. Për ne do të ishte shumë mirë që të rritej pragu prej 30 mijë lekësh në 40 mijë lekë i tatimit mbi të ardhurat personale, e cila do të bënte vërtetë një diferencë, – tha Hoxha për “Monitor”.

Por nuk janë të gjithë kundër.

Skënder Pashaj, administrator i kompanisë së këpucëve Fital, i kontaktuar nga Monitor tha se rritja e pragut të pagës minimale është e drejtë, por qeveria duhet të ishte konsultuar paraprakisht me grupet e interesit për këtë vendim. “Edhe në kërkojmë që të rriten rrogat e punëtorëve dhe kjo rritje me 2 mijë lekë nuk është një tragjedi për sektorin tonë, por duhet të ishin në dijeni duke qenë se ne punojmë me kontrata dhe përcaktojmë çmimet në varësi të kostove. Problemi jonë i vetëm është rënie e pashpjegueshme e euros dhe jo rritja e pagave,”- tha Pashaj.

Pro vendimit të rritjes së pagës minimale është shprehur edhe Luan Leka, administrator i kompanisë së përpunimit të sallameve EHË dhe Qafshtama. “Mua më rezulton se nuk ka më paga kaq të ulëta dhe mendoj se ky vendim do të luftojë deri diku informalitetin që bëhet duke deklaruara paga më të ulëta se realja,”-tha Luan Leka për Monitor.

Ndikimi do të jetë i papërfillshëm edhe për kompaninë e këpucëve Donianna. Donika Mici, administratore e kompanisë tha se tashmë pagat e punëtorëve të tyre e kanë kaluar pragun minimal të vendosur nga qeveria, por shtoi se më të prekurat do të jenë kompanitë të cilat shesin minuta punë dhe jo produkt final. Kostot e punës përbëjnë zërin kryesor të shpenzimeve për kompanitë fason dhe një rritje e pagës minimale do të rrisë shpenzimet në mënyrë të papritur.

Qeveria vendosi në mbledhjen e saj të fundit rritjen e pragut të pagës minimale në 26 mijë lekë dhe ky vendim do të hyjë në fuqi menjëherë pas 1 janarit./Monitor/