Paguhen më pak, dhe, shqiptarët kanë orët më të gjata të punës në Evropë
Në Bashkimin Europian, BE, në vitin 2023, personat e aftë për punë të moshës 20-64 vjeç, punonin mesatarisht 36.1 orë në javë, sipas Eurostat.
Ky numër u referohet orëve, që njerëzit kanë punuar realisht në punën e tyre kryesore, në javën e referencës.
Orari mesatar i punës në javë, ndryshon ndërmjet vendeve të BE-së. Ato me javën më të gjatë të punës, ishin Greqia 39.8 orë, Rumania 39.5, Polonia 39.3, dhe, Bullgaria 39.0 orë.
Në të kundërt, Holanda, kishte javën më të shkurtër të punës 32.2 orë, e ndjekur nga Austria 33.6 dhe Gjermania 34.0 orë.
Shqiptarët, punojnë me orët më të gjata në Europë
Të dhënat e INSTAT tregojnë se shqiptarët punojnë më gjatë se të gjithë në Europë. Për vitin 2023, të punësuarit me pagë punonin mesatarisht 43.7 orë në javë, ose 7.6 orë më shumë se mesatarja europiane.
Orët më të gjata janë në prodhim 46.5, bujqësi 44.8 e ndërtim 45.6 dhe më të ulëtat në administratë 40 orë në javë.
Pas Shqipërisë renditet Turqia me 43.1 orë në javë.
Ballkani përgjithësisht punon më gjatë. Në Mal të Zi punonjësit janë në punë 42.8 orë në javë, në Serbi 41.3, në Bosnje 41.2 dhe në Maqedoninë e veriut gati 40 orë në javë.
Ndonëse shqiptarët rrinë më gjatë në punë, ata paguhen më pak se të gjithë, teksa si paga minimale ashtu dhe ajo mesatare janë më të ulëtat në rajon ndërkohë nuk ka të dhëna për Kosovën.
Personat e punësuar sipas orëve mesatare të punës aktuale
Në BE, në vitin 2023, 37.1 për qind e të punësuarve, punonin mesatarisht ndërmjet 40 dhe 44.5 orë në javë, ndërsa vetëm 7.1 për qind regjistronin më pak se 20 orë punë aktuale në javë, në punën kryesore.
Diapazoni 40-44.5 i orëve aktuale të punës përfaqëson pjesën më të madhe në shumicën e vendeve – me përjashtim të Irlandës, Finlandës, Belgjikës, Francës dhe Danimarkës, ku pjesa më e madhe e të punësuarve, ishte në intervalin 35-39.5 orë mesatare të punës në javë.
I njëjti interval orësh 40 deri në 44.5, tregon gjithashtu dallimet më të mëdha midis vendeve.
Përqindjet më të mëdha, u regjistruan në Bullgari 82.2 për qind, Rumani 80.2 për qind dhe Letoni 77.7 për qind. Përqindjet më të ulëta, u gjetën në Belgjikë 16.1 për qind, Francë 13.3 për qind dhe Danimarkë 10.6 për qind./Monitor/
