Panairi i Turizmit në Berlin, sfidat dhe strategjia e qeverisë për zhvillimin e turizmit shqiptar
Në Panarin e Turizmit në Berlin, ministri i Shqipërisë, Blendi Gonxhja, flet për Deutsche Welle për sfidat e sektorit dhe strategjinë e qeverisë për zhvillimin e turizmit shqiptar.
Cili është fokusi i prezantimit të Shqipërisë në ITB?
Theksi është te trashëgimia, eksperienca dhe tregimi i së shkuarës: parqet arkeologjike, qytetet historike, qytetet që i kemi në UNESCO, pasuritë muzeale, jeta, tradita dhe artizanati, turizmi i eventeve dhe kalendari shumë i pasur i Shqipërisë në kuptimin e kulturës, duke bashkuar turizëm, kulturë, rini e sport me evente ndërkombëtare që sjellin shumë vizitorë.
Turizmi ka pësuar rritje të menjëhershme vitet e fundit, a prisni të ketë rritje të mëtejshme këtë vit?
Ne duhet të shkojmë nga sasia te cilësia. Synimi nuk është më thjesht të rritemi në numra; synimi është rritja cilësore dhe sa më e shpërndarë. Numrat vijnë shpesh të përqendruar në pak muaj rreth sezonit veror. Ne duhet të bëjmë ç’është e mundur të lëvizim nga deti drejt zonave më të thella, drejt maleve, si dhe drejt muajve të tjerë të vitit – shtator, tetor, nëntor, dhjetor, janar, shkurt, mars – që janë muaj më të vështirë. Strukturat tona të akomodimit kanë nevojë të punojnë gjatë gjithë vitit.
Sipas të dhënave zyrtare, mbi një e pesta e ekonomisë shqiptare lidhet me turizmin. Keni përllogaritur se sa e ka rritur turizmi mirëqenien e qytetarëve?
Ne bëjmë shumë llogaritje dhe kemi shumë të dhëna që tregojnë se numrat realë janë shumë më të lartë dhe shumë premtues. Problemi ynë është se njëkohësisht duhet të luftojmë informalitetin dhe të fillojmë me deklarimin e gjithçkaje që bëjmë për ta bërë ekonominë sa më të formalizuar. Kjo garanton mbledhjen e të ardhurave të duhura dhe shpërndarjen e tyre për sektorët e tjerë të ekonomisë dhe për nevojat sociale që vendi ka. Rishpërndarja mbase nuk është ende aty ku duhet, sepse formalizimi është ende një betejë. Por jemi tashmë aty ku duhet dhe, me digjitalizimin e shërbimeve të fiskalizimit dhe faturimit, do të shkojmë drejt një zbardhjeje të plotë të xhiros vjetore, që do të sjellë përfitime shumë të mëdha për komunitetin.
Ka kritika për betonizimin e bregdetit dhe mosruajtjen e standardeve mjedisore. Si përgjigjeni ju?
Në shumë prej projekteve më të fundit që janë miratuar ose kanë filluar të ndërtohen kemi komplekse të projektuara nga studio shumë të mira evropiane dhe botërore. Sot kemi një garë arkitektësh për projekte me standardet më të larta. Problemi ynë kryesor lidhet më shumë me trajtimin e mbetjeve dhe me sjelljen tonë ndaj mjedisit. Sa i takon standardeve të ndërtimit, sidomos në jug dhe nga Vlora e poshtë, projektet janë nga më të mrekullueshmet. Edhe projekti i ri i Sazanit është konceptuar me ndërhyrje minimaliste dhe me shumë kujdes për ishullin dhe natyrën.
Sa problem mbetet çështja e pronave për zhvillimin e turizmit?
Është një problem real. Ka mbivendosje pronash dhe konflikte që vijnë nga fakti se në shumë raste dokumentet nuk janë bërë në kohë, ndërsa pronësia është trashëguar sipas zakonit. Procesi i kthimit dhe regjistrimit të pronave ka çaluar gjatë viteve të tranzicionit. Kjo ka ndikuar edhe në investimet e reja, në zhvillimin urban dhe infrastrukturor dhe turistik. Ky është një problem që ka qenë i lidhur edhe me drejtësinë. Një drejtësi e munguar në vite ka bërë që shumë problematika të pronës të transmetohen te qytetarët në nivele civile, në mosmarrëveshje, në vonesa.
Jeni optimist për zgjidhjen e këtyre problemeve?
Çdo shtëpi ka hallet e veta, çdo vend ka hallet e veta. Por mendoj se shumë nga këto probleme së shpejti do t’i përkasin të shkuarës, sepse janë regjistruar shumë zona. Proceset e regjistrimit dhe legalizimit janë drejt përmbylljes në shumë zona. Të dyja së bashku do të bëjnë që shumë shpejt shqiptarët të kenë të kapitalizuara, qoftë publike e qoftë private, pronat e tyre, pra pronat përkatëse, dhe këto do të ndihmojnë shumë në bizneset, zhvillimet dhe investimet./DW/
