Paralajmërimi nga Barometri i Ballkanit, PD: Rrezik, vendi po shpopullohet!
Pas publikimiti të rezultateve të Barometrit të Ballkanit 2022 nga Këshilli i Bashkëpunimit Rajonal, RCC, ku rezulton se 42 për qind e shqiptarëve duan të emigrojnë, ka reaguar Partia Demokratike përmes Sekretares për Organizatat Partnere në PD, Megi Balliu, duke theksuar se shqiptarët pasi kanë humbur “luftën e klasave”, nuk shohin alternativë veç emigrimit.
“Partia Demokratike dëshiron të theksojë edhe njëherë rrezikun e shpopullimit të vendit. Të gjithë treguesit, të gjitha sondazhet, e dëshmojnë këtë. Përsëritja e faktit dhe mesazhit nga opozita nuk bëhet për qëllime të tjera, por veç një arsye: një Shqipëri e boshatisur përbën një emergjencë kombëtare.” thekson Megi Balliu duke shtuar se kjo kambanë bie për ata që kanë veshë, jo për qeverinë, që bën veshin e shurdhër.
Ndryshe, rezultatet e Barometrit të Ballkanit 2022 tregojnë se pas Kosovës, Shqipëria kishte përqindjen më të lartë të personave që kërkojnë të emigrojnë, me 42 për qind.
Anketa e RCC me rreth 6000 qytetarë në Bosnje, Serbi, Kosovë, Shqipëri, Maqedoninë e Veriut dhe Malin e Zi tregon se zhvillimi ekonomik dhe papunësia mbeten dy pengesat kryesore në ekonominë e rajonit. Situata aktuale ekonomike konsiderohet sfida më e madhe nga 47 për qind e të anketuarve në Ballkanin Perëndimor. Nga ana tjetër, papunësia është më e dëmshme për ekonominë, për 39 për qind e të anketuarve. Korrupsioni renditet i treti me 27 për qind.
Deklaratë
42 përqind e shqiptarëve kërkojnë të emigrojnë.
Shifra alarmante vjen nga Barometri i Ballkanit, një sondazh vjetor i Këshillit të Bashkëpunimir Rajonal.
Vendimi për të ikur kuptohet më qartë, po të vëresh një tjetër shifër të sondazhit.
88 përqind e shqiptarëve mendojnë se hendeku i pasurisë është thelluar.
Pasi kanë humbur ‘luftën e klasave’, shqiptarët nuk shohin alternativë veç emigrimit.
Partia Demokratike dëshiron të theksojë edhe njëherë rrezikun e shpopullimit të vendit.
Të gjithë treguesit, të gjitha sondazhet, e dëshmojnë këtë.
Përsëritja e faktit dhe mesazhit nga opozita nuk bëhet për qëllime të tjera, por veç një arsye: një Shqipëri e boshatisur përbën një emergjencë kombëtare.
Kjo kambanë bie për ata që kanë veshë! Me sa duket, jo për qeverinë, që bën veshin e shurdhër.
Ata shohin oborrin e tyre dhe thonë: qentë le të lehin, karvani të bëjë përpara!
Ne shohim karvanin e njerëzve që ikin dhe një Shqipëri në rrezik.
