Parlamenti Evropian voton për liberalizimin e vizave për Kosovën

Me 420 vota për, 186 kundër dhe 22 abstenime, Parlamenti Evropian votoi rekomandimin e Komiteti për liritë qytetare, drejtësi dhe çështje të brendshme, për liberalizimin e vizave për Kosovën.

“Qytetarët e Kosovës edhe një hap para lëvizjes pa regjim vizash në Evropë”, ka shkruar në Twitter, Raportuesja për vizat në Parlamentin Evropian, Tanja Fajon duke bërë publik lajmin e shumëpritur nga qytetarët e Kosovës.

Tani radhën për të votuar këtë rekomandim e ka edhe Këshilli i Ministrave të BE-së

Pas këtij votimi të Parlamentit Evropian konfirmohet mandati për fillimin e bisedimeve me vendet anëtare të BE-së, në mënyrë që Kosovës t’i liberalizohen vizat. Bisedimet në emër të Parlamentit Evropian do t’i udhëheqë, Tanja Fajon, raportuese për vizat në Parlament.

Ndërkaq, menjëherë pas votimi përmes një postimi në Twitter, Fajon tha se qytetarët e Kosovës janë edhe një hap më afër udhëtimit pa viza në Evropë.

Takimi i parë i grupit i punës do të mbahet më 17 shtator. Pasi që të përafrohen bisedimet në kuadër të grupit punues, pastaj çështja kalon në nivel të ministrave të Brendshëm të Bashkimit Evropian, të cilët vendosin për këtë përmes votimit me një shumicë të kualifikuar.

Ndryshe, Komisioni Evropian më 18 korrik të këtij viti, vendosi se Kosova i ka përmbushur gjitha kriteret dhe i rekomandoi Bashkimi Evropian të liberalizojë vizat për qytetarët e Kosovës