Parlamenti i Kosovës, opozita nuk pranon konstituimin por dhunën. Ndërpritet seanca

Përkundër dështimit të 50 përpjekjeve për të konstituuar Parlamentin e Kosovës, dhunës tashmë të shafqur në Parlament dhe vullnetit të disa palëve që të çoj drejt dështimit shtetin e Kosovës, zgjidhja tashmë ka marrë rrugë për situatën që krijoi kjo klasë politike e papërgjegjshme.

Seanca konstituive e Parlamentit të Kosovës u ndërpre sot, pasi deputetja e PDK-së, Ganimete Musliu dhe Kryesuesi i seancës, Avni Dehari, patën një përplasje verbale.

Avni Dehari i kërkoi regjisë t’ia ndalë fjalën Ganimete Musliut duke u thirrur në Rregulloren e Parlamentit që nuk ka hapësirë për debat, porkjo e fundit ia mori mikrofonin Deharit për ta vazhduar fjalimin e duke i kërkuar që të mos i ndërpritet fjala.

Kryesuesi Dehari mbylli seancën duke thënë se nuk ka kushte për vazhdimin e saj. Vazhdimi i radhës është caktuar për të premten e 18 Korrikut në orën 11:00.

Ndryshe, Presidentja Vjosa Osmani dorëzoi dje në Gjykatën Kushtetuese kërkesën për qartësi se çfarë ndodhë pas 30 ditëshit të përcaktuar me aktgjykimin e fundit për konstituimin e Parlamentit. 

“Dua të iu njoftoj që sot në përmbushje të përgjegjësisë sime kushtetuese për të garantuar funksionimin demokratik të institucioneve të vendit kam paraqitur kërkesë në Gjykatën Kushtetuese për të shqyrtuar konfliktin e kompetencave kushtetuese të krijuar nga mungesa e konstituimit të Kuvendit të Republikës së Kosovës. Kjo është një kërkesë që paraqitet pas një situate të paprecedentë në jetën institucionale të vendit tonë, ku pas aktgjykimit të Gjykatës Kushtetuese, i cili ka paraqitur afatin kushtetues të detyrueshëm kanë mbetur vetëm pak ditë,” tha Vjosa Osmani pasi nuk shihen në horizont as kompromisi as konsensusi brenda këtij afati kushtetues.

“Duke qenë se çdo afat i detyrueshëm kushtetues e çdo moszbatim i aktgjykimeve të Gjykatës Kushtetuese duhet të ketë edhe pasoja juridike, por ato nuk janë sqaruar në aktgjykimin paraprak, kërkesa jonë është kërkesë për qartësimin e pasojave juridike të moskonstituimit të Kuvendit brenda afatit 30 ditësh. Kjo kërkesë ka karakter preventiv, është kërkesë që bëhet për shkak të parandalimit të pasojave të pariparueshme dhe është në përputhje të plotë me Kushtetutën e praktikat e Gjykatës Kushtetuese,” tha Presidentja Osmani duke siguruar se kërkesa e dërguar në Kushtetuese nuk e paragjykon epilogun në afatin prej 4 ditësh për konstituim, dhe nëse ka ndonjë sukses në konstituimin e Parlamentit brenda 4 ditësh ata mund ta tërheqin kërkesën.

“Edhe pse qartësitë për çështjet që i kemi ngritur në këtë kërkesë ne besojmë që janë esenciale jo vetëm për këtë legjislaturë, por edhe në të ardhshmet!”

Presidentja e Kosovës tha se bashkë me kërkesën për interpretim, kanë paraqitur kërkesën për masë të përkohshme për pezullim të rrjedhjes së afatit prej 30 ditësh.

“Kërkesa për masë të përkohshme është mundësi që të shmanget futja e institucioneve në një bllokadë pafund dhe hyrja në një situatë ku institucionet do të mund të krijoheshin në mënyrë kundërkushtetuese e do të ishin të pasafatshme. Kërkesa  është që të parandalohet dëmi i pariparueshëm e të mbrohet interesi publik, dy kritere që duhet të plotësohen për masë të përkohshme. Përkundër përpjekjeve të mija të vazhdueshme për të lehtësuar komunikimin e bashkëpunimin mes subjekteve politike, Kuvendi ende nuk është konstituuar,” tha Osmani duke shtuar se qeveria po funksion me kompetenca të kufizuara e institucioni i presidencës nuk mund të ushtrojë në mënyrë të plotë kompetencat kushtetues për shkak të moskonstituimit të Parlamentit.

“Shumë kompetenca të presidencës janë të ndërvarura me Kuvendin, siç janë ratifikimi i marrëveshjeve ndërkombëtare, çështjet me ushtrinë, rendin kushtetues, dekretimi i ligjeve, apo rikthimi i ligjeve,” tha Presidentja duke saktësuar pyetjet që kanë kërkuar sqarim.

“Në rast të mos respektimit të afatit se a do të ishte një Kuvend kundërkushtetues nëse konstituohet pas 26 korrikut, se a do të ishte një qeveri e votuar nga ai Kuvend po ashtu kundërkushtetues, se a mundet presidenca ta caktojë mandatarin që rrjedhë nga një Kuvend kundërkushtetues dhe a do të mund presidenca ta caktojë mandatarin i cili do të votohet në një Kuvend i cili nuk është themeluar me Kushtetutën. Të gjitha këto janë çështje që janë adresuar në kërkesën tonë, të gjitha me qëllim të mbrojtjes së rendit kushtetues. Kjo nuk është situatë hipotetike, por krizë reale e cila mund të rëndohet akoma më shumë pas kalimit të afatit 30 ditor,” tha Presidentja e Kosovës, Vjosa Osmani duke i bërë thirrje subjekteve politike të veprojnë me përgjegjësi. 

“Në këtë moment vendimtar për demokracinë e stabilitetin e vendit tonë u bëj thirrje të gjitha subjekteve politike që të veprojnë me përgjegjësi, t’i japin fund bllokadës e tu japin qytetarëve atë që ë u takon me kushtetutë. Kjo kërkesë e dorëzuar në gjykatë nuk është zgjedhje politike, por një obligim kushtetues e moral ndaj popullit që ka votuar për të pasur institucione funksionale. Zëri i popullit është më i fuqishëm se çdo bllokadë e Kushtetuta gjithnjë duhet të jetë mbi çdo llogari tjetër politike.”