Partisë Demokratike nuk i duhet lufta kundër Sali Berishës, por, Edi Ramës!
Që Ervin Salianji e lufton Kryetarin e Partisë Demokratike, Sali Berisha, kjo nuk është diçka e re, këtë e ka deklaruar edhe në dhjetorin e vitit 2021 kur tha se Berisha po minonte opozitarizmin dhe elementë të demokracisë duke dëmtuar kështu edhe trashëgiminë e tij politike, por, duke mos njohur as fjalën “kritikë” tashmë deklaron se kundër Sali Berishës, përveç Salianjit, dolën edhe mbi 500 asqerët e tij në Durrës!
Dhe jo vetëm kaq! Duke i mbajtur ison mediave nën kontrollin e Edi Ramës përkatësisht Sigurimit të Shtetit, Ervin Salianji thotë se më shumë kishte protestues në tubimin e Durrësit se sa në Platformën Parlamentare para Kryeministrisë së organizua nga Sali Berisha!
Duke e pranuar si fakt konstatimin e Ervin Salianjit se më shumë qytetarë kishte në tubimin e tij në Durrës se sa në Platformën Parlamentare para Kryeministrisë, nuk duhet të shpërfillim dhe faktin se para Kryeministrisë protestohet kundër Edi Ramës ndërsa në tubimin që organizoi ai, protestohej kundër Sali Berishës!
Apriori nuk mund të fajësohen të gjithë ata që Salianji thotë se ishin “mbi 500”, dhe, shpëtimin e Partisë Demokratike e shohin tek zhdukja nga faqja e dheut të Sali Berishës, por, që të gjithë duke përfshirë edhe vetë Salianjin, janë fajtorë që shpëtimin e PD e shohin tek Ervin Salianji!
Këta asqerë të Salianjit, si protagonistë të një jetese për 35 vjet nën kumbimin mediatik të Sigurimit të Shtetit se “Fajet i ka Saliu”, mund të jenë prekur nga kjo propagandë komuniste dhe pas zgjedhjeve të humbura të 11 Majit që pasuan me refrenin tashmë të dëgjuar “zgjedhjet u vjedhën” dhe fajtor ekskluziv e shohin Saliun, por, si është e mundur që asnjëri prej këtyre “500 demokratëve” nuk e pyeti veten se si është e mundur që të gjithë këta këmbues mediatik të Sigurimit të transmetojnë “live” tubimin e tyre në krye me Salianjin, duke dhënë lajmin shumë të gëzuar për lindjen e një lëvizje që do ta rifreskoj Partinë Demokratike pa asnjë shqetësim që PD po rifreskohet; Dhe, nga ana tjetër, asnjëri prej këtyre këmbuesve të Sigurimit nuk e transmeton “live” Platformën Parlamentare para Kryeministrisë që e organizon Saliu ndërsa qëndisin lajmin plotë gëzim e hare që PD nuk po rifreskohet dot!
Nëse “mbi 500 demokratë” pranuan ftesën dhe iu bashkuan lëvizjes për ta zhdukur Sali Berishën nga faqja e dheut për ta shpëtuar Partinë Demokratike, si është e mundur që asnjëri prej tyre nuk e pyeti veten se pse Ervin Salianji e aq më pak Dr.Ilir Alimehmeti, nuk i ftuan qoftë edhe 5 demokratë në Durrës kundër Edi Ramës!
Arsyet ishin të shumëta, madje jetike për këtë qytet bregdetar!
Nëse askush nuk e ndalon Ervin Salianjin të organizoj një tubim me “demokratë” kundër Sali Berishës, askush nuk e ka ndaluar dhe Salianji nuk organizoi një tubim kundër Edi Ramës kur u zhduk nga faqja e dheut Porti i Durrësit, dhe iu dha për përdorim miqëve arabë të Presidentit të Serbisë, Aleksandar Vuçiç, për ta shndërruar njërin ndër portet më të rëndësishëm në rajon, dhe vital për shqiptarët në Shqipëri dhe gjithë Ballkanin Perëndimor, në një port të jahteve të trafikantëve të drogës; Apo, ku ishte Salianji me 500 asqerët e tij në Durrës, të protestojnë kundër abuzimit me rindërtimin pas tërmetit shkatërrimtar të 26 Nëntorit 2019, kur sot e kësaj dite njerëzit jetojnë në çadra!
Dhe, kur jemi te tërmeti, ku ishte Salianji me gjithë këta 500 trima që nuk i lëvizi as qerpiku shkurtin e vitit 2024 kur u lirua nga burgu Ish-Kryetari i Bashkisë Durrës, Vangjush Dako, dhe, GJKKO i caktoi masën “arrest në shtëpi”. Sikur edhe mos të shqetësohet njeri për shpërdorimin e detyrës lidhur me Projektin “Promenadë”, mjafton dhënia e lejes së ndërtimit nga Gjushi të një pallati në Durrës në kundërshtim me ligjin, i cili u dëmtua rëndë nga tërmeti dhe u shpall i pabanueshëm, që gjithë këta asqerë të Salianjit që kërkuan sebep për t’u rebeluar dhe të kërkojnë rifreskimin e PD duke larguar Saliun, të kërkojnë rifreskimin e qeverisjes së Shqipërisë duke kërkuar largimin e Edi Ramës!
Por, jo, nuk lëvizi njeri, as Salianji, as asqerët e tij e aq më pak këmbuesit mediatik të Sigurimit që kundër qeverisjes së Edi Ramës në qytetin bregdetar të Durrësit nuk e imagjinojnë një protestë, qoftë dhe në rast të përmbytjeve që ndodhin çdo herë kur bie shi mbi 20 minuta pa ndërerë!
Në fund, a mund të funksionoj tutje Partia Demokratike siç po funksionon sot dh etë vijë në pushtet, përgjigja është e prerë, Jo! Por, zgjidhja nuk është as lufta kundër dhe as zhdukja nga faqja e dheut e Sali Berishës sepse nuk qëndronte dhe nuk qëndron as sot bindja e Ervin Salianjit nga 8 dhjetori i vitit 2021:
“…Nuk po e minon demokracinë Sali Berisha? Plotësisht. Të gjithë trashëgimia e Berishës, po dëmtohen tani. A është i korruptuar do e shikojmë. Minues i demokracisë. Absolute me qëndrimet publike të tij. Duke tentuar të minojë opozitarizmin dhe elementë të demokracisë…”
Kur nuk mund të funskionoj tutje Partia Demokratike siç po funksionon sot, nuk funksionon dot as Shqipëria pa 550 mijë mbështetës të PD, sepse është Edi Rama ai i cili ka minuar gjithçka duke përfshirë demokracinë dhe trashëgiminë politike të çdo lideri në hapësirën shqiptare, duke përfshirë dhe Sali Berishën!
Dhe, këtë duhet ta kenë të qartë Dr.Ilir Alimehmeti me 500 asqerët e Ervin Salianjit në Durrës sikur edhe të harrojnë dajakun e Salianjit më 8 Janar 2022 me shkop bejzbolli; Sepse për shpëtimin e Partisë Demokratike dhe Shqipërisë, çdo reformë në PD dhe hapja e partisë që kërkohet, nuk duhet të bëhet me qëllimin për të luftuar Sali Berishën, Kryetarin e Partisë Demokratike e zgjidhë vota!
Partia Demokratike ka përpara vetëm një luftë serioze, kundër Edi Ramës!
