Partitë e reja nuk ndihmojnë as demokracinë as Ramën, vetëm Sigurimin e Shtetit!
Me fillimin e fushatës për zgjedhjet parlamentare të 11 Majit, “analistët” filluan të bindin opinionin se nuk është e vërtetë që partitë e reja ndihmojnë Edi Ramën siç thotë Partia Demokratike sepse ato në fakt ndihmojnë demokracinë, ndërsa Rama e ka fitoren e sigurt!
Në një sistem pak të shëndosh demokratik, lindja e partive të reja natyrisht se do t’i shërbente demokracisë, por, në një sistem si ky i shtetit të Edi Ramës me këtë Kod Zgjedhor, kur lindin parti të reja dhe asnjëra nuk interesohet ta rrëzoj Kryeministrin që është në pushtet për 12 vjet por liderin e opozitës Sali Berishën, kundërmon jo pak erë Sigurimi!
Nëse këtij kundërmimi i shtojmë edhe shpërthimin e “analistëve të mrekullueshëm” në këtë muaj zgjedhor, me mundimin e kot të PD kur çdo sondazh e nxjerrë Edi Ramën 12.5 për qind mbi Sali Berishën që renditet i dyti, nga po këta analistë që Ramën e grinin me korrupsionin alarmant në çdo muaj të vitit me përjashtim të atij zgjedhor, kundërmimi fillon dhe kullon gjak, pra, Sigurim të Shtetit!
As Demokraci as Edi Ramë
Për të mos u përsëritur në gjurmët e gishtërinjve të kriminelit Soros të cilat jo në pak raste janë prezente, janë disa enigma që konfirmojnë një dukuri shumë më kriminale!
E para, si është e mundur që nga gjithë këta liderë rebelë që na paskan lindur dhe krijuan parti sepse nuk durojnë Sali Berishën që, vetëm sipas tyre, vrau demokracinë dhe mbanë në pushtet Edi Ramën, vijnë nga Zona e Parë Operative!
Shqipëria vërtetë ka nevojë për demokraci edhe pse pjesë e saj janë njerëz të rritur në familje me pushtet dhe krim nga kjo Zonë, por, fillimisht, pasardhësit e Zonës së Parë Operative duhet të kërkojnë falje për krimet nga viti i zi 1943 nga Mitrovica në Prizren, nga Prizreni në Tivar, nga Shkodra në Mirditë, nga Tropoja në Dibër, nga Korça në Konispol, nga Brukseli në New York, dhe, së fundi për vitin e zi 1997, e pastaj edhe mund të flasin për Gërdecin e 21 Janarin duke e kërkuar drejtësinë qoftë edhe nga SPAK-u!
E dyta, si mund të shkelësh në një fushë politike kaq të minuar sa e parafytyrojnë ata Sali Berishën, duke pasur parasysh përvojën e LSI-së nga viti 2021 me 107.5 mijë vota të fituara që i rezultuan me katër mandate, dhe, me këtë Kod Zgjedhor, si parti që nuk janë të gatshme për koalicion ndonëse asnjë sondazh nuk iu jep në total aq vota sa fitoi LSI, që ishte destinuar në atë vit të zhduket nga skena politike!
Belinda Balluku në atë kohë e quajti qartë “kafshimi i mollës së LSI”, apo këta lider të rinj nuk duan t’ia dinë çfarë mendon Edi Rama, Bela dhe partia e tij! Kot, do të krijojnë parti për të humbur, dhe, të çorientojnë aq sa mund të çorientosh ithtarët e Saliut, dhe, votat tjera le të shkojnë te Edi Rama!
E treta, si mund ta demokratizojnë Shqipërinë ma mirë se Sali Berisha kur nuk kanë asnjë lidhje as me vlerat e familjes, as me besimin, as me pronat, as me të përndjekurit politik, aq më pak me demokracinë!
I gjithë ky “qëllim” shfaqet që në Listën e Mbyllur ku tallen me prindin, fëmijën, familjarin dhe mikun e tyre, vetëm për qëllimet e tyre politike!
Ka prej tyre që janë larguar nga Sali Berisha sepse ju pengonin malokët që, sipas tyre ishin kudo, dhe, meqë kishin lekë për të krijuar parti, realizuan qëllimin dhe nën petkun e të përndjekurit dhe biznesmenit, mbushën listën e partisë me 2/3 e kandidatëve nga Zona e Parë Operative, për tu mjaftuar vetëm me dy shkodranë, dy tropojanë dhe tre kuksianë nga 186 kandidatë që përzgjodhi dora vetë në mënyrë “demokratike”; Dhe, “ndryshe” nga Saliu, vazhdon mendon edhe sot se ka krijuar një mundësi që shqiptarët mund të votojnë për veten e tyre!
Në fund, duke ndaluar si thiu në akull mendojnë se mund të bindin një njeri normal se vota për Saliun mbanë në pushtet Edi Ramën! Apo kanë harruar që janë mburrur se vijnë nga zona ku kishte Ballistë, aty ku kurrë askush nuk e ka menduar as në çastin më të zi, nga Mitrovica në Sarandë, se mbështetja për Ballin është mbështetje për të qëndruar në pushtet krimineli Enver Hoxha!
Dhe, harruan me qëllim duke arsyetuar pa dashje akuzën se nuk janë paratë e tyre, se ardhmja demokratike mund të ndërtohet me pasardhësit e kriminelëve që nuk kanë vetëm duart por mbyten në gjak shqiptarë!
E katërta, si mund të mos e ndihmojnë partitë e reja Edi Ramën por demokracinë?! Me këtë ndarje territoriale, me këtë Kod Zgjedhor dhe pas 12 vjet qeverisjeje kriminale të Edi Ramës, nuk ka kurrfarë mundësie sepse kjo nuk varet nga ata!
Që ta heqin njëherë e mirë nga mendja, partitë e reja nuk mund ta ndihmojnë demokracinë sepse ajo nuk ekziston në Shqipëri! Nëse ndonjëra e ka menduar rilindjen e kësaj demokracie por ka frikë ta thotë nga Edi Rama, ky është tjetër problem!
Oksigjen për Sigurimin e Shtetit
Si të tilla, të vetëgetoizuara nga opozita, partitë e reja hedhin vota me ose pa dashje në koshin e Edi Ramës, ku përjashtim vazhdon të jetë vetëm “Lëvizja Bashkë” e Arlind Qorrit; Atij koshi të cilin Rama e mbush vetëm me vota të blera!
Për pjesën tjetër të votave në atë kosh, ishte Sigurimi i Shtetit ai i cili i mblodhi me mënyrën e vetë, ashtu siç po bënë edhe sot me bizneset që i kontrollon dhe këto parti të reja, që nuk janë paterica, siç i akuzojnë disa kot, por kanë fut lugën në çorbën e Sigurimit duke e ditur se është e mbushur me gjak!
Këto parti dhe liderët e tyre, deri më sot janë konsultuar me institucione të ndryshme dhe mburren me ekspertë që kanë në gjirin e tyre, por nuk denjuan të trokasin në derën e Autoritetit të Dosjeve, ai i cili ekziston jo për të treguar nëse kandidatët e tyre për deputetë janë malokë, por, nëse janë ose jo spiun të Sigurimit të Shtetit!
Si mund t’ia vëmë emrin partive të reja kështu siç janë krijuar pak rëndësi ka, sot ato ekzistojnë dhe në këto rrethana ndihmojnë vetëm Sigurimin e Shtetit që të qëndroj në pushtet!
