Pas 20 minutave leksion të Edi Ramës, Macron: Vizat për Kosovën i kemi pezulluar!

Pas një fjalimi prej 20 minutave të Kryeministrit Edi Rama që nuk djersiti vetëm Presidentin e Francës, Emmanuel Macron, u dëgjuan dhe mesazhet e prera të liderit francez pse sot është në Tiranë, nga integrimi evropian i Shqipërisë deri tek zgjidhja e çështjes së Kosovës për të cilën tha se i ka pezulluar vizat.

E Edi Rama edhe me këtë rast e nisi me lojëra fjalësh për të impresionuar Macronin duke theksuar se shpesh e shmang fjalën “i lumtur” ashtu siç e sugjeron protokolli diplomatik, dhe përdor fjalën “i kënaqur”, por tha se në këtë rast ndihet “shumë i lumtur” që gjendet krahë Presidentit të Francës në Tiranë.

“Jam besimplotë se me gjithë këtë shtysë të forta që na keni dhënë sot për të patur kontakt shumë më të ngushtë mes vendeve, frëngjishtja ime nesër do jetë më e mirë se sot.

Në protokollin diplomatik fjala “i lumtur” përdoret shpesh. E vërteta është se sa herë gjendem në një situatë si kjo ku duhet shprehur kënaqësia për pritjen e një miku të çmuar e evitoj këtë fjalë, që sugjeron ministria e jashtme në fjalimet e mia dhe them “i kënaqur”,Sot dëshiroj të them me plotë gojën se jam i lumtur, shumë i lumtur që jam në krah të Presidentit francez, jo në Paris, Bruksel apo tjetër kryeqytet të Europës, por në Tiranë. Jam shumë i lumtur që pas një pritjeje shekullore, në Shqipëri vjen për një vizitë shefi i shtetit francez.

Kjo është më shumë se një vizitë formale, është miqësore dhe angazhimi për të thelluar më tej marrëdhënien mes vendeve tona. Po të shohim të dhënat ka njohur një zhvillim të papritur në vitet e fundit si rezultat i një riangazhimi të Francës në rajon përmes angazhimit të drejtpërdrejtë të Presidentit në kërkim të një marrëdhënie shumë konkrete dhe produktive për BE-në dhe Ballkanin Perëndimor.

Marrëdhënie kjo që duhet të jetë në gjendje që në çdo hap t’u japë vendeve tona mundësinë e bashkimit me Europën, pa rënë në kurthin e traditës së procesit të integrimit, i cili sipas meje dhe Presidentit duhet të vijojë në meritën e çdo vendi, por nuk duhet lënë të bëhet një arsye ankthi në raport me të ardhmen e vendeve tona. Jam shumë i lumtur që Presidenti e tha mbrëmë qartë se zgjerimi i BE-së nuk duhet të pengojë ribashkimin e Europës dhe për këtë unë jam shumë shpresëplotë që Presidenti do udhëheqë një proces të tillë,” u shpreh Edi Rama duke gëzuar pas fjalimit të lodhshëm si Presidentin e Francës ashtu dhe të pranishmit ndonëse vinin nga Asambleja e Partisë Socialiste.

“Jam i lumtur që jam këtu, në një moment kaq të vështirë për Europën tonë, që i është nënshtruar rikthimit të luftës në territorin e saj me atë që po përjeton Ukraina, me rikthimin e terrorizmit në vendin tonë. Brukseli u sulmua mbrëmë dhe dy shtetas suedezë u prekën nga ky sulm terrorist. Tani po mendoj për ta. Të jem në krahun e tuaj sot do të thotë që të shënoj një formë riangazhimi të Francës në vendin tonë dhe në rajon.  Ishte një gabim i thellë që prej vitit 1912 asnjë president francez nuk ka ardhur në vendin tuaj. Ishte momenti për ta bërë. Kjo vizitë zyrtare ishte një rregullim i gabimit,” tha Macron duke vazhduar të flas për Shqipërinë e ankoruar në Evropë.

“Në luftën kundër krimit e trafikut, ju falënderoj që keni qenë efikasë në këtë fushë, gjë që na ka bërë të nënshkruajmë një marrëveshje dhe ta vëmë në zbatim. Do të vazhdojmë të ecim përpara të përforcuar nga kjo dinamikë. Jam i bindur që vendi juaj është i ankoruar në Evropë. Jo vetëm në këtë zonë, ku deshën t’iu mbyllin shumë herë, ndërsa ju kishit atë karakterin tuaj të veçantë në rajon, por edhe në Mesdhe. Po hyjmë në erën e re të ribashkimit të kontinentit tonë.

Rruga e Shqipërisë drejt Bashkimit Evropian është e pakthyeshme. Përshëndes rrugën e reformave që keni ndërmarrë. Jeni një vend e një popull që e donte Evropën, kjo është thelbësore,” tha Emmanuel Macron duke shpresuar se do ta vazhdojmë këtë rrugë:

“Duke investuar edhe më shumë në gjuhën frënge, duke rritur më shumë aleancat franceze, si dhe ecim më shumë për liceun francez të Korçës. Duhet të hapim terrene të reja.

Shpresoj që ne të jemi në krahun tuaj, në ambicien tuaj, për turizmin. Të kemi francezë të planit të parë në kahun tonë, që vetëm që ju të hapni shkolla të nivelit të parë, por edhe të formoni shqiptarë e shqiptare të reja me zanatet digjitale. Trajnimet në këtë fushë, është një sektor ku ne duam të ecim përpara.

Do ta shoqërojmë Shqipërinë në reformat e saj ekonomike, tranzicionin energjetik. 210 milionë euro janë hedhur në punë për disa projekte, dhe do të hidhen edhe më shumë deri në vitin 2027 për projektet tuaja. Agjenda dypalëshe po shtohet dhe në javët e ardhshme do përgatisim një marrëveshje, që do mundësojë këtë marrëdhënie të shkojë më lart.”

Në fund, tha Presidenti Macon, shpreson që muajt e ardhshëm ne si europianë të rigjejmë rrugën e bashkimit për ta bërë këtë një lëvizje të pakthyeshme.

“Kjo është jeta e popujve. Jetojmë në kohë pasionesh. Unë dua që Europa jonë të jetë mjeti që vendi juaj të ecë përpara në rrugën e përparimit dhe zhvillimit. Këtë do ta bëjmë bashkë. Ju e keni kuptuar më së miri se unë jam i bindur që epoka që po hapet do sjellë ribashkimin e Europës tonë dhe zgjidhjen e tensioneve në rajon. Tensione që i dimë si ato mes Beogradit dhe Prishtinës, por këtu ka një rrugë, është udhërrëfyesi franko-gjerman që duhet të vazhdojë.

Unë ndjej forcën e ëndrrës evropiane tek ju. Dua të citoj një autor që nuk është Kadare, ju bëni pjesë në këtë Perëndim që iu është rrëmbyer fillimisht nga Perandoria Osmane e më pas nga diktatura komuniste.”

Dhe, para se të largohej nga skena e Edi Ramës, Presidenti i Francës, Emmanuel Macronm tregoi pse nuk ishte pjesë e Samitit të Procesit të Berlinit duke bërë të ditur se përkohësisht i janë pezulluar vizat Kosovës.

“Ne e ndjekim më shumë vigjilencë tensionet mes Prishtinës dhe Beogradit. Franca dhe Gjermania kanë bërë një propozim që mendoj se është i mirë dhe presim te respektohet nga të dyja palët. Besoj se është përgjegjësi e Vuçiç që të dënojë aktin e 24 shtatorit.

Ajo që presim nga autoritetet kosovare dhe serbe është e thjeshtë, riorganizimin e zgjedhjeve në këto komunat ku këto u bënë në kushte të papërshtatshme, pjesëmarrjen e serbëve në këto zgjedhje, njohjen e asociacionit të komunave serbe nga autoritetet kosovare,” tha Emannuel Macron duke përfunduar me bombën për Kosovën dhe gjithë shqiptarët:

“Pres që presidenti Vuçiç,  presidentja Osmani dhe kryeministri i Kosovës, Kurti, të jenë të përgjegjshëm. Ne u kemi besuar për çështjen e vizave dhe u pezullua nga ana e Francës se ka të bëjë me respektin e fjalës së dhënë dhe fjala nuk është mbajtur. Pres që të angazhohen të dyja palët që të ecim përpara në javët e ardhshme, është kushti i paqes në të gjithë zonën.”