Pas bisedës me Kurtin dhe Vuçiçin, Borrell: Kërkova urgjentisht të shtensionojnë situatën!

Pas bisedimeve që zhvilloi me kryeministrin Albin Kurti dhe presidentin serb, Aleksandar Vuçiç lidhur me situatën në veriun e Kosovës, Përfaqësuesi i Lartë për Politikë të Jashtme dhe Siguri në BE, Josep Borrell, tha në Bruksel se ju ka kërkuar urgjentisht të marrin masa për të shtensionuar situatën.  

“Kam folur me kryeministrin Kurtin edhe sot në mëngjes, dhe presidentin Vuçiç gjatë natës dhe kam kërkuar nga ta që urgjentisht të marrin masa për të shtensionuar situatën. Si hap i parë pres që institucionet e Kosovës t’i heqin forcat policore nga ndërtesat e komunave në veri të Kosovës, dhe protestuesit të qetësohen,” tha Borrell i cili kërkoi nga Kosova që t’i pezullojë operacionet policore rreth ndërtesave të komunave në veri, derisa e dënoi dhunën ndaj forcave të rendit nga ana e protestuesve.

“BE-ja dënon ashpër dhunën në veri të Kosovës që kemi parë në ditët e fundit. Dhuna ndaj qytetarëve, mediave, forcave të rendit dhe trupave të KFOR-it është e papranueshme dhe sjell një situatë të rrezikshme,” tha Borrell pas takimit që zhvilloi në Bruksel me Presidentin e Malit të Zi, Jakov Millatoviç, duke shtuar se BE qëndron pranë NATO-s dhe KFOR-it në përmbushjen e mandatit, në interes të paqes dhe stabilitetit në Kosovë.

Ndërsa zëdhënësi i Bashkimit Evropian, Peter Stano, në pyetjen e gazetarëve në Bruksel ka refuzuar që të përgjigjet në pyetjen e gazetarëve se kush i ka sulmuar ushtarët e KFOR-it më 29 maj në Zveçan, duke u përgjigjur se “për dhunën në veri, përgjegjës janë Kosova dhe Serbia”.

Ndryshe, gjatë protestave të dhunshme në veri, sot KFOR ka bërë të ditur se janë plagosur 30 ushtarë të misionit të NATO-s në Kosovë, tre prej të cilëve kanë marrë plagë nga armët e zjarrit.