Pas dorëzimit të mandateve/ Basha në Vjenë, PPE: Situata në Shqipëri është shqetësuese

Një ditë pas protestës së Opozitës së Bashkuar e cila u finalizua me dorëzimin e mandateve të deputetëve, kryetari i Partisë Demokratike, Lulzim Basha,  zhvilloi në Vjenë një takim me Presidentin e Asamblesë Parlamentare të OSBE, George Tsereteli ndërsa mori edhe në një seancë posaçme dëgjimore.

Duke e cilësuar si shqetësuese situatën e krijuar në Shqipëri, grupi i PPE në OSBE bën të ditur se raportimi i kryetarit Basha ka patur në fokus protestat kundër qeverisë socialiste, korrupsionin, trafikun e drogës dhe zhvillimet jodemokratike në vend.

Në këtë seancë të posaçme dëgjimore morën pjesë edhe anëtarë të Kongresit dhe Senatit amerikan. Mësohet se gjatë qëndrimit disaorësh në Vjenë, kreu i opozitës ka zhvilluar takime edhe me drejtues të tjerë të institucioneve ndërkombëtare.

Ndryshe, ëllimi i këtyre takimeve është shpjegimi i situatës politike në Shqipëri, e cila ka në bazë blerjen e zgjedhjeve nga Kryeministri Rama nëpërmjet krimit të organizuar, siç e provojnë përgjimet e dosjes 339.

Ndërkohë në Vjenë ndodhen prej disa ditësh edhe kryetari i Partisë Republikane, Fatmir Mediu si dhe ai i Demokristianëve Nard Ndoka. Ata pritet të kthehen bashkë me Lulzim Bashën kur dhe do të firmosin dorëheqjen e parevokueshme nga mandati i deputetit në Parlamentin e Shqipërisë.