Pas Këshillit të Sigurisë Kombëtare, Meta: Çështjet kryesore që u diskutuan…

Pas Këshillit të Sigurisë Kombëtare lidhur me situatën e krijuar nga COVID-19, Pesidenti i Republikës pasi falënderoi Kryetarin e Parlamentit, Kryeministrin dhe liderin e opozitës bëri të ditur edhe çështjet kryesore që u diskutuan:

“Vlerësimi mbi situatën aktuale, masat që po ndërmerren për përballimin e pasojave ekonomike dhe sociale, zhvillimi i procesit arsimor dhe strategjia e planifikuar për përfundimin e vitit akademik 2019-2020, si dhe ndryshimet e propozuara në Kodin Penal,” bëri të ditur Ilir Meta përmes një Deklarate në rrjetin social Facebook duke përfunduar:

“Sa më efikas të jetë ky bashkëpunim, aq më shpejt do t’i rikthehemi normalitetit dhe jetës plot gjallëri.”

Ndërkohë Kryeministri Edi Rama përmes rrjetit social Twitter edhe pse foli për një mbledhje të gjatë të Këshillit të Sigurisë Kombëtare u mjaftua me një njoftim në pak rreshta por duke e pranuar: se sikur komunikimi publik të ishte kaq pozitiv, politika do ishte shumë ndryshe.

“Mbledhje e gjatë por e dobishme e Këshillit të Sigurisë Kombëtare dhe një shkëmbim i hapur opinionesh me Presidentin e Republikës & kryetarin e PD për hapjen graduale të aktivitetit në javët në vijim! Sikur komunikimi publik të ishte kaq pozitiv, politika do ishte shumë ndryshe,” tha Edi Rama duke injoruar sërish kërkesën e opozitës për rritjen e numrit të testimeve në veçanti personelit mjekësor që siç duke edhe për Presidentin Meta jo që nuk është çështje kryesore por as çështje.

Deklaratë:

Të dashur qytetarë,

Nëpërmjet një video-konference zhvilluam sot mbledhjen e radhës të Këshillit të Sigurisë Kombëtare lidhur me situatën që po kalon vendi nga përhapja e pandemisë globale COVID-19.
Çështjet kryesore që u diskutuan ishin vlerësimi mbi situatën aktuale, masat që po ndërmerren për përballimin e pasojave ekonomike dhe sociale, zhvillimi i procesit arsimor dhe strategjia e planifikuar për përfundimin e vitit akademik 2019-2020, si dhe ndryshimet e propozuara në Kodin Penal.

Mbledhja u zhvillua në një frymë bashkëpunimi, dhe për këtë dua të falenderoj Kryetarin e Kuvendit, z.Gramoz Ruçi, Kryeministrin z.Edi Rama dhe Kryetarin e Partisë Demokratike z.Lulzim Basha.

Vlerësova rëndësinë e rritjes të efikasitetit të masave, përmes ndërgjegjësimit, transparencës, gjithëpërfshirjes dhe rritjes së frymës së bashkëpunimit, pasi objektivi madhor i përbashkët është mbrojtja e shëndetit të qytetarëve, i ekonomisë kombëtare, si dhe përmbyllja e vitit shkollor.

Falenderoj qytetarët për mirëkuptimin dhe bashkëpunimin e dëshmuar, që duhet të vijojë, në interes të përbashkët.

Sa më efikas të jetë ky bashkëpunim, aq më shpejt do t’i rikthehemi normalitetit dhe jetës plot gjallëri.

SË BASHKU DO T’IA DALIM! ??