Pas konsultimeve me partitë politike, U.D. Presidentja e Kosovës: Zgjedhjet do të mbahen në 7 Qershor

“Pas vlerësimit të afateve kushtetuese, nevojave organizative të KQZ-së, dhe rëndësisë së pjesëmarrjes sa më të gjerë të qytetarëve në këtë proces kam vendosur që zgjedhjet e parakohshme për Kuvendit e Republikës së Kosovës të mbahen me 7 qershor,” tha Ushtruesja e Detyrës së Presidentes, Albulena Haxhiu, pas takimit me liderë dhe përfaqësues të partive politike ku u diskutua caktimi i datës së zgjedhjeve të parakoshme parlamentare.

Ndryshe, pas takimit me U.D. Presidenten, Albulena Haxhiu, kryetari i PDK-së, Bedri Hamza, tha se për partinë që drejton cilado nga datat brenda afateve kushtetuese është e pranueshme qoftë 31 maj apo 7 qershor.

“Ne jemi të përgatitur, të gatshëm të shkojmë në zgjedhje brenda listës së PDK-së do të ketë risi, emra dhe figura të tjera,” tha Bedi Hamza ndërsa Jehona Lushaku Sadriu nga LDK tha se si parti kanë dhënë opinionin e tyre, prandaj tha se janë dakord për datën 7 qershor meqë si datë e ka kërkuar edhe KQZ-ja.

“Synojmë t’i japim Kosovës një vizion tjetër, bashkim të së djathtës e cila do të ketë program zhvillimor, për një Kosovë që i forcon aleancat ndërkombëtare, që prezanton projekte zhvillimore hapë vende pune e jo ta lërë vendin në sanksione e skema sociale. Besoj shumë që qytetarët e Kosovës do ta shohin këtë risi,” tha Lushaku Sadriu derisa Ardian Gjini nga AAK u mjaftua të thotë se zgjedhjet janë shancë për vendin.

“Ne po bëhemi gati t’i japim Kosovës atë që duhet, stabilitet e rrugë të zhvillimit e populli i Kosovës duhet ta shfrytëzojë këtë,” tha Ardian Gjini ndërsa sqaroi se është i propozuari i AAK-së për Kryeministër në zgjedhjet e ardhshme.

“Vendimet në AAK i merr Këshilli Drejtues, jam i propozuar për kandidat për kryeministër dhe bartës së listës, por duhet pritur vendimit e Këshillit Drejtues të AAK-së i cili pritet të ndodhë shpejt.”