Pas paktit Balla-Alibeaj, PD: Rama kërkon ta shes kandidatin e tij si President konsensual!
Pas marrëveshjes së deputetëve të Lulzim Bashës të kryesuar nga Enkelejd Alibeaj me Kryetarin e Grupit Parlamentar të PS-së, Taulant Balla, për zgjedhjen e presidentit, sot ka reaguar sërish Komisioni i Rithemelimit i PD përmes deputetit Oerd Bylykbashi duke theksuar se Edi Rama kërkon që kandidatin e tij të preferuar ta sjellë opozita dhe ta shesë si President konsensual.
Në prag të mbledhjes së Grupit Parlamentar të PD-së të cilën e thirri i emëruari i Gazment Bardhit, Enkelejd Alibeaj ndonëse i shkarkuar nga Këshilli i ri Kombëtar, Komisionit të Rithemelimit tha se Alibeaj pranoi marrëveshjen që i ofroi Balla për llogari të Ramës dhe pa asnjë tagër ka thirrur sot deputetët e PD-së që të legalizojë marrëveshjen e tij personale me Ramën.
“Dje u shpall një marrëveshje e re. Balla i dha të drejtën Alibeajt të propozojë kandidatë për president. Rama kërkon që kandidatin e tij të preferuar ta sjellë opozita dhe ta shesë si President konsensual,” tha Bylykbashi duke folur dhe për mbledhjen e Grupit Parlamentar që thirri Alibeaj:
“Alibeaj pranoi marrëveshjen që i ofroi Balla për llogari të Ramës dhe pa asnjë tagër ka thirrur sot deputetët e PD-së që të legalizojë marrëveshjen e tij personale me Ramën. Deputetët e PD janë të ndërgjegjshëm që përfaqësojnë vullnetin e demokratëve. Opozita nuk ka nevojë për marrëveshje për të propozuar kandidatë sepse kjo është në kushtetutë. PD e denoncon këtë marrëveshje të pavlerë. Presidenti i shqiptarëve duhet të jetë përfaqësuesi real i vullnetit të popullit”.
Ndryshe, pas një debati të stërgjatur dhe bosh, sot Kryetari i Grupit Parlamentar të PS, Taulant Balla, i pranoi pa kushte kriteret për zgjedhjen e Presidentit të Republikës që u propozuan nga deputetët e Lulzim Bashës ndonëse nuk janë pranuar nga Grupi Parlamentar i PD, deri në raundin e tretë ku socialistët nuk do të bëjnë as propozime për Presidentin dhe do presin ato të opozitës ndërsa për raundin e katërt dhe të pestë Taulanti tha se fletë Kushtetuta.
