Pas Protestës/ Intervista, Rama: Probleme ka, dorëheqje nuk jap…

Pas gjashtë vjet qeverisjeje e pranon që  në Shqipëri ka korrupsion dhe kjo nuk diskutohet, papunësia është problem serioz, nuk e mohon as problemin me trafikun e drogës ashtu si edhe problemet reale që kanë studentët, por pas protestës së 16 shkurtit, kryeministri Edi Rama në një intervistë për të përditshmen italiane “Corriere della Sera” thotë se në Shqipëri nuk po ndodhë asgjë.

Dhe çuditërisht në gjithë këtë krizë që e ka sjellë vendin, Edi Rama problemin e shehë vetëm te Opozita:

“Nuk po ndodh asgjë. Nëse ka ndonjë gjë është kriza e thellë e opozitës që nuk është në gjendje të sfidojë qeverinë politikisht. Kjo minorancë është më e dobët në krahasim me zgjedhjet e vitit 2017: nëse do të shkonim në votim nesër do të merrnin akoma më pak vota.”

I pyetur lidhur me mundësinë e djegies së mandateve nga opozita dhe kërkesave që ajo ka pashtruar, ai është prerë se për dorëheqje as që është duke menduar dhe nuk i intereson asnjë kërkesë që nuk është e mazhorancës:

“As nuk e çoj ndërmend. Kam një mandat të qartë nga populli, kemi një mazhorancë në Parlament dhe në fund unë kam detyrimin përballë bashkëkombësve të mi. Nuk jam i detyruar të ndjek kërkesat e minorancës parlamentare. I vetmi detyrim është kontrata me popullin shqiptar, që na ka dhënë votën për të qeverisur.|

Në fund, ashtu si edhe me përfundimin e Protestës së Madhe të 16 Shkurtit, i vetmi shqetësim që ka Edi Rama është shkatërimi i kërpudhës para Kryeministrisë.

Intervista e plotë:

Zoti Kryeministër, organizatat ndërkombëtare theksojnë nivelin shqetësues të korrupsionit në Shqipëri.

Që në Shqipëri ka korrupsion është jashtë diskutimit. Dhe është një problem. Por mund të them gjithashtu se kjo qeveri po bën çmos për ta zhdukur atë.

Po, por ju jeni kreu i Qeverisë prej pesë vitesh.

Më lejo të them se jemi duke u impenjuar në maksimum për Reformën në drejtësi. Tani më shumë se kurrë po luftojmë korrupsionin dhe jemi duke punuar që administrata publike të jetë imune ndaj ryshfeteve.

Po ja dilni mbanë?

Sigurisht që është një luftë e gjatë: rezultatet nuk mund të vijnë menjëherë.

Të dhënat makroekonomike tregojnë se papunësia po bie, edhe mes të rinjve. Por akoma mes këtyre të rinjve ka pakënaqësi…

Sot Shqipëria tregon të dhëna mjaft pozitive, mjafton të lexojmë shifrat e Bankës Botërore. Kjo nuk do të thotë se e kemi zeruar papunësinë apo se kemi zgjidhur problemin e të rinjve, por kjo tregon se jemi në rrugën e duhur.

Më pas është edhe plaga e gjyqtarëve të cilët i japin vendimet në këmbim të ryshfeteve. Çfarë po bëni për këtë?

Ajo që askush nuk ka pasur kurajon ta bëjë në vend e në Ballkan, gjë që e ka nënvizuar edhe Bashkimi Europian.  Ne jemi duke çuar përpara një reformë që do të heqë nga gjykatat magjistratët e gjykatësit e korruptuar.

Një tjetër problem është trafiku i drogës që vazhdon të jetë i përhapur në shumë pjesë të vendit…

Nuk mund ta mohoj. Por pikërisht disa ditë më parë Guardia di Finanza italiane prezantoi raportin e vitit 2018 për luftimin e kanabisit në vend dhe rezultatet ishin spektakolare për sa kohë që ky fenomen është luftuar nga qeveria ime.

Protesta e studentëve disa javë më parë ju bëri që të ndërronit disa ministra.
Kjo do të thotë se kjo ngjarje ishte e ndjeshme?

Ishte një diskutim i sinqertë ku ata denonconin probleme reale. Për këtë arsye i kemi dëgjuar dhe i kemi mirëpritur kritikat e tyre.

Protesta e ditës së shtunë dhe tentativa për të sulmuar godinën e  kryeministrisë kanë bërë xhiron e botës. Çfarë po ndodh tani në Shqipëri?

Nuk po ndodh asgjë. Nëse ka ndonjë gjë është kriza e thellë e opozitës që nuk është në gjendje të sfidojë qeverinë politikisht. Kjo minorancë është më e dobët në krahasim me zgjedhjet e vitit 2017: nëse do të shkonim në votim nesër do të merrnin akoma më pak vota.

Por opozita, udhëhequr nga Lulzim Basha, lideri i Partisë Demokratike, ka hedhur drejt jush akuza shumë të rënda: mashtrim në zgjedhje, korrupsion. Thotë se jeni të lidhur me krimin e organizuar.

Nuk do t’i përgjigjem as këtyre akuzave. Jam vetëm i shqetësuar sepse politika e hedhjes së baltës nuk do t’i ndihmojë as ata e as vendin. Shpresoj që sa më shpejt arsyeja t’i kthehet dhe të mbizotërojë mbi dëshpërimin.

Opozita ka kërkuar djegien e mandateve. Ju çfarë keni ndërmend të bëni?

As nuk e çoj ndërmend. Kam një mandat të qartë nga populli, kemi një mazhorancë në Parlament dhe në fund unë kam detyrimin përballë bashkëkombësve të mi. Nuk jam i detyruar të ndjek kërkesat e minorancës parlamentare. I vetmi detyrim është kontrata me popullin shqiptar, që na ka dhënë votën për të qeverisur

Domethënë pas asaj që ndodhi të shtunën, sipërmarrësit italianë dhe ato të huaj nuk duhet të tremben aspak?

Jo. E vetmja gjë që bëri protesta e opozitës ishte një imazh negativ i Shqipërisë me një dhunë absurde, por me një rezultat zhgënjyes. E vetmja pasojë konkrete ishte shkatërrimi i një vepre arti, një kërpudhë që ishte vendosur në oborrin e Kryeministrisë./“Corriere della Sera”/