Pas publikimit të përgjimeve/ Alizoti e përmend, Ardi Veliu në Prokurori…
Pasi u përmend nga Fredi Alizoti në një përgjim, se e kishte marrë në makinë dhe i kishte bërë presion, sot në Prokurorinë e Krimeve të Rënda është thirrur për të dëshmuar Drejtori i Përgjithshëm i Policisë, Ardi Veliu.
Para kësaj dëshmie para organit të akuzës, Veliu përmes një deklarate të Policisë së Shtetit ka mohuar lidhjen me Alizotin.
“Drejtori i Përgjithshëm i Policisë së Shtetit nuk ka qenë për asnjë rast, në asnjë rrethanë dhe në asnjë cilësi shoqërues, kontaktues apo në çdo formë tjetër i shtetasit Alfred Alizoti. Atë që ky i fundit deklaron në një video të regjistruar në mënyrë të fshehtë dhe e prezantuar publikisht nga deputeti Salianji, është fund e krye E PAVËRTETË. Për këdo të interesuar është lehtësisht i verifikueshëm fakti se Drejtori i Përgjithshëm në ditën që shtetasi Alizoti është shoqëruar në Prokurorinë e Krimeve të Rënda, ka qenë me angazhime të tjera. Me përgjegjësi publike deklarojmë se Drejtori i Përgjithshëm i Policisë së Shtetit në asnjë rast nuk është përfshirë në veprime procedurale në lidhje me hetimin e çështjes të ashtunjohur publikisht si çështja ‘Babale’,” thekson Policia e Shtetit.
