Pas sugjerimit të PD/ Reagimi, Edi Rama: Krimin e kanë mjet politik!

Pas sugjerimit të Partisë Demokratike që zbatimin e ligjit “Anti-KÇK”, të cilin Edi Rama e paralajmëroi me bujë, që ta nisë me goditjen e trafikantëve të dënuar të drogës dhe pasurive të tyre të paligjshme, si Edmond Bego i Taulant Ballës, reagoi ashpër Kryeministri duke akuzuar PD-në se krimin e kanë mjet politik kundër qeverisë, por s’e kanë pasur kurrë në shënjestrën e tyre!

“PD ve në dyshim kushtetutshmërinë e paketës Anti-KÇK? Asnjë suprizë! As kanë parë gjë akoma po as kemi dëgjuar gjë akoma nga goja e tyre,” thekson përmes rrjetit social Twitter dukshëm i painformuar me reagimin e Partisë Demokratike duke vazhduar me akuzat:

“Krimin e kanë mjet politik kundër qeverisë, por s’e kanë pasur kurrë në shënjestrën e tyre! Përkundrazi! E kanë ushqyer e janë ushqyer prej tij,” tha Kryeministri Edi Rama duke e përfunduar me një vjellje! Ndaj kujt?! Këtë e din tashmë njeriu i cili dje e bëri të qartë ndërsa prezantoi Njësitin “Operacioni Forca e Ligjit” se është gati për një përballje ekstreme me krimin e organizuar dhe “kur është ekstreme koha për t’i dhënë një përgjigje dërrrmuese, jo vetëm krimit, por edhe të gjithë atyre ushqejnë mosbesimin te angazhimi ynë për të luftuar deri në fund.” 

Ndryshe, zbatimin e ligjit “Anti-KÇK”, të cilin Edi Rama e paralajmëroi me bujë se do ta niste me goditjen e madhe kundër krimit të organizuar, Partia Demokratike sot i propozoi Kryeministrit le ta nisë me goditjen e trafikantëve të dënuar të drogës dhe pasurive të tyre të paligjshme, si Edmond Bego i Taulant Ballës, për të cilin, bashkë me Erion Veliajn, ndryshuan rrjedhën e lumit të Lanës, duke i hapur rrugën pastrimit të 60 milionë eurove.