Pas takimit me Kurtin, diplomatët e BE: S’mund të japim detaje, do takojmë dhe presidentin e Serbisë
I dërguari i Posaçëm i Bashkimit Evropian për dialogun Kosovë-Serbi, Mirosllav Lajçak, nuk dha detaje pas takimit me kryeministrin e Kosovës, Albin Kurti, në lidhje me dialogun Kosovë-Serbi.
Pas takimit që Lajçaku mbajti së bashku me këshilltarët e sapoemëruar të Gjermanisë dhe Francës për këtë dialog, Jenns Plettner dhe Emmanuel Beaune, raporton RFE, ai tha se patën një diskutim të rëndësishëm me Kurtin.
“Ishte një diskutim i thellë dhe i rëndësishëm. Besoj e kuptoni se nuk mund të japim detaje, sepse do të kemi diskutim të njëjtë me presidentin e Serbisë, Aleksandar Vuçiç,” tha Lajçak.
Zyra e kryeministrit nëpërmjet një komunikate e ka komentuar takimin e Kurtit me diplomatët duke thënë se Kosova ka treguar vullnetin dhe gatishmërinë e saj për t’u angazhuar në “një dialog parimor dhe të përgatitur mire”.
“Kryeministri Kurti ritheksoi se qëllimi i dialogut, nga i cili duhet të përfitojnë qytetarët e të dyja vendeve, duhet të jetë arritja e një marrëveshjeje ligjërisht të obligueshme me njohjen reciproke në qendër”, thuhet në komunikatë.
Pas qëndrimit në Kosovë, Lajçak dhe dy këshilltarët evropianë u nisës drejt Beogradit, ku do të takohen me presidentin e Serbisë, Aleksandar Vuçiç.
Ndryshe, RFE raporton se qëllimi i vizitës së diplomatëve evropianë është shqyrtimi i opsioneve për përparim në dialogun për normalizimin e raporteve ndërmjet Prishtinës dhe Beogradit.
Më 4 shtator, presidenti i Francës, Emmanuel Macron, dhe kancelari i Gjermanisë, Olaf Scholz, emëruan këshilltarët që të ndihmojnë në dialogun që ndërmjetësohet nga BE-ja.
Në një letër dërguar Kurtit dhe Vuçiçit, Macron dhe Scholz thanë se normalizimi i raporteve mes Kosovës dhe Serbisë është thelbësor për Ballkanin Perëndimor. Macron dhe Scholz, po ashtu, u bënë thirrje liderëve të Kosovës dhe Serbisë që të tregojnë vendosmëri dhe gatishmëri maksimale për të ndërmarrë vendime të vështira, të cilat, siç thanë ata, çojnë drejt përparimit të dialogut.
