Pas takimit me Presidenten e Kosovës, Basha: Një nga vendimet e para si kryeministër, heqja e traut në Rrugën e Kombit!

Kryetari i Partisë Demokratike, Lulzim Basha, pas takimit me Ushtruesen e Detyrës së Presidentit të Kosovës, Vjosa Osmani, ka përsëritur zotimin për të hequr traun në Rrugën e Kombit, si një nga vendimet e para të tij si Kryeministër ndërsa Parlamenti i ri kur PD të vijë në pushtet do të miratojë një Rezolutë për dënimin e krimeve të Serbisë në Kosovë.

“Ripërsëris sot zotimin tim, një nga vendimet e mia të para si Kryeministër do të jetë heqja e traut në Rrugën e Kombit si dhe negocimi me qeverinë kosovare për mosvendosjen e ansjë pengese tarifore në autostradën Ibrahim Rugova. Ky sigurisht është minimumi, shumë më shumë duhet të bëhet. Në veçanti duke pasur parasysh potencialin e jashtëzakonshëm të dy vendeve tona dhe gjendjen e vështirë ku ndodhen dhe në veçanti rininë e Shqipërisë dhe Kosovës,” tha Lulzim Basha duke shtuar se si dy përfaqësues të brezit të ri në politikë e shohin të ardhmen e dy vendeve tek rinia.

“Kemi një obligim të madh ndaj të rinjve dhe e dimë se e ardhmja ka emrin dhe fytyrën e rinisë shqiptarë. Të rinisë së Shqipërisë dhe të Kosovës. Do të bëjmë gjithçka për të forcuar ekonomitë tona që po vuajnë dhe rënkojnë prej kohësh dhe në veçanti në këtë kohë pandemie dhe për të kthyer shpresën dhe besimin e rinisë dhe gjithë qytetarëve për të ndërtuar jetën e tyre,” tha Kryetari i Partisë Demokratike duke e konsideruar parakusht për këtë luftën kundër krimit të organizuar dhe korrupsionit ndërsa premtoi bashkëpunim të ngushtë.

“Dua të shpreh mirënjohjen time të thellë për mesazhet e qarta dhe të paekuivoke të kryetares së Kuvendit dhe të ushtrueses së detyrës të presidentit të Kosovës të shprehura dhe gjatë fjalës së djeshme dhe gjatë takimit me presidentin Meta dhe ta siguroj atë dhe përmes saj institucionet dhe popullin e Kosovës se si kryetar i PD dhe opozitës sot dhe nesër me përgjegjësitë që do më ngarkojnë qytetarët shqiptarë, por pa diskutim dhe si nip i juaji do të bëj gjithçka që të rikthej bashkëpunimin në nivele më të larta. Shumë shpejt do keni fuqinë e plotë të mendjes, të zemrës dhe të energjive të Shqipërisë në krahun e Kosovës dhe çdo qytetari të saj.”

Ndërsa Presidentja e Kosovës, Vjosa Osmani, kërkoi edhe sot pas takimit me Kryetarin e PD, Lulzim Basha, që Parlamenti i Shqipërisë të miratojë një Rezolutë, që dënon gjenocidin serb në Kosovë, që është parë nga të gjithë ndërkombëtarët.

“Faleminderit për mikpritjen e ngrohtë këtu në selinë e PD-së. Si presidente, kërkoj bashkëpunimin e sinqertë, si dy motra ndërmjet dy Republikave të Shqipërisë dhe Kosovës.

Duhet të punojmë të gjithë bashkë, sepse mbi të gjitha jemi shqiptarë. Të punojmë bashkë që flamuri i Shqipërisë dhe Kosovës të radhiten krah njëra tjetrës në çdo organizatë ndërkombëtare. Jemi dy flamuj, por jemi një shpirt i pamposhtur. Kështu duhet të jemi edhe mes vete, edhe përpara botës,” tha Vjosa Osmani duke falënderuar Bashën për deklarimin e përhershëm për sovranitetin e Kosovës.

“Ne kërkojmë që të dënohet gjenocidi serb në Kosovë me anë të një rezolutë. Duhet të dënojmë krimin serb, pa asnjë pikëpyetje. Nuk ka pikëpyetje që Serbia ka kryer gjenocid. Serbia nuk ka dashur vetëm pastrim etnik, por synimi serb ka qenë që të shfarosë popullin shqiptar. Ne jemi këtu ku jemi, për shkak të luftës së UÇK-së, për shkak të Shqipërisë dhe aleancave botërore.

Serbia dhe aleatët e saj po falsifikojnë historinë. Shpresoj se përkrahjen do ta kemi përherë, që zërin tonë ta dëgjojë gjithë bota. Ju falënderoj zoti Basha që jeni deklaruar përherë për sovranitetin e Kosovës.”

Ndryshe, dje Ushtruesja e detyrës së Presidentes së Kosovës, Vjosa Osmani nga foltorja e Parlamentit të Shqipërisë tha se Shqipëria është ëndrra jonë e përbashkët dhe Kosova nuk ka nevojë për tra të vendosur nga Shqipëria. “Në kohën e integrimit europian vendosja e çfarëdo barriere komunikimi mes dy vendeve tona është kundër frymës së lëvizjes së lirë dhe forcimit të marrëdhënieve ndërshtetërore e ndërshqiptare. Na lini të vijmë siç deshën të parën tanë, ashtu siç duam ne dhe siç do duan dhe fëmijët tanë,” tha ndër të tjera Vjosa Osmani.