Pas takimit me Presidenten, Hovenier: Kryetarët të kryejnë detyrat, por jo të hyjnë me forcë!

Pas takimit me Presidenten e Kosovës, Vjosa Osmani, Ambasadori i SHBA në Prishtinë, Jeff Hovenier, tha se kryetarët e komunave në veri duhet të kryejnë detyrat e tyre, por jo të hyjnë më forcë në objektet e komunës.

“Kisha takim me presidenten Vjosa Osmani me kërkesë të saj. I keni parë reagimet tona. Janë shumë të qarta,” tha Hovenier duke shprehur shqetësimin:

“Jemi shumë të shqetësuar për situatën në veri. Kryetarët duhet të kryejnë detyrat e tyre, por jo të hyjnë më forcë në objektet e komunës,” tha Ambasadori amerikan në Kosovë duke bërë të ditur se Ambasadorin e BE-së në Kosovë, Szunyog, ka  ftuar në takim katër kryetarët e komunave veriore, por vetëm dy iu janë bashkuar, ai i Zveçanit dhe Zubin Potokut.

“Edhe me ta diskutuam për shqetësimet lidhur me situatën,” tha Hovenier duke përsëritur se Qeveria e SHBA dhe ato të vendeve të Quintit e kanë potencuar se sa e rëndësishme është që zyrtarët të hyjnë në institucionet shtetërore pa përdorimin e  forcës.

“Ky mbetet ende qëndrimi ynë. Edhe me kryetarët e diskutuam se si mund ta kryejnë detyrën e tyre dhe t’u shërbejnë qytetarëve, sidomos pa pasur nevojë për forcë që të hyjnë në institucione.”