Pas takimit me Tusk, Pendarovski dhe Zaev presin çeljen e negociatave, Katica në gjendje të rëndë…
Pas takimit me Presidentin e Këshillit Evropian, Donald Tusk, në Shkup, Presidenti i Maqedonisë së Veriut, Stevo Pendarovski dhe Kryeministri Zoran Zaev u shprehën se presin çeljen e negociatave me Bashkimin Europian ndërsa Zaev nuk e fshehu se pas epilogut të rastit “Reket” ku u shkarkua dhe arrestua Prokurorja Speciale, Katica Janeva, pret edhe shpërblimin nga Brukseli zyrtar ndërkohë u raportua se Katica është në gjendje të rëndë shëndetësore.
Presidenti Pendarovski në takim me Donald Tusk duke theksuar se Maqedonia në dy vitet e fundit ka sjellë vendime të rënda për çështje shumë të ndjeshme, përfshi edhe Marrëveshjen e Prespës me Greqinë dhe Marrëveshjen për miqësi, fqinjësi të mirë dhe bashkëpunim me Republikën e Bullgarisë, ka shprehur pritshmërinë se Këshilli Evropian në tetor do t’i vlerësoj përpjekjet e vendit dhe do ta verifikoj rekomandimin e 10-të të Komisionit Evropian përmes caktimit të datës për fillim të negociatave për anëtarësim në Bashkimin Evropian, bënë të ditur Presidenca e Maqedonisë së Veriut.
“Republika e Maqedonisë së Veriut e bëri të veten, tani radhën e ka Evropa që të përfundoj pjesën e saj,” tha Presidenti i Këshillit Evropian, Donald Tusk pas takimeve me Presidentin Pendarovski dhe Kryeministrin Zaev ndërsa kujtoi Marrëveshjen e Prespës, ballafaqimin me krizën e migrantëve dhe tejkalimin e krizës politike në vend.
“Mbetem në qëndrimin që kam shprehur edhe në qershor, se vendi i juaj gjatë dy viteve të fundit bëri gjithçka që Europa priste nga ju për t’i filluar negociatat, në pajtim me rekomandimet e Komisionit Evropian. Kjo është edhe më tej bindja ime, vendi i juaj bëri çmos. Shkupi është vendi më i mirë nga ku dua ti bëjë apel liderëve të BE-së, se tani ju duhet ta përmbushni pjesën tuaj, sepse Republika e Maqedonisë së Veriut tanimë ka mbaruar pjesën e saj,” tha Tusk.
Ndërsa Kryeministri Zoran Zaev pas takimit me Presidentin e Këshillit Evropian, duke shpresuar, siç tha, interesin e përbashkët ta kurorëzojmë në tetor, rasti “Reket” tha paraqet test për institucionet e drejtësisë në vend.
“Sot kemi nder që ta presim mikun tone kreun e Këshillit të Evropian Z.Donald Tusk i cili asnjëherë nuk ndaloi duke mbështetur rrugëtimin e Maqedonisë drejt BE-së. Shpresojmë që këtë interes të përbashkët ta kurorëzojmë në tetor. Pas 10 rekomandimeve të Komisionit Evropian dhe rezultatet që arritëm, gjithnjë e më shumë jemi të bindur që t’i sfidojmë të gjitha pengesat për fillim të negociatave,” tha Kryeministri Zoran Zaev, sipas të cilit, rasti “Reket” paraqet test për institucionet e drejtësisë në vend.
Por ky test për institucionet e drejtësisë që mund ti hap rrugë Maqedonisë së Veriut për çeljen e negociatave me Bashkimin Evropian ka përkeqësuar gjendjen shëndetësore të Ish-Prokurores Speciale, Katica Janeva, e cila u shkarkuar dhe u arrestua pikërisht për rastin “Reket”.
Katica Janeva e cila gjendet në paraburgim si e dyshuar në rastin “Reket”, është nën trajtim mjekësore ndërsa avokatja e Janevës ka theksuar se do të kërkoj heqjen e masës së paraburgimit dhe t’i mundësohet që të mbrohet në liri, ndërkohë që si garanci do të ofrohet prona e sajë.
