Krizë e prodhuar nga Edi Rama dhe krimi, Basha: PD dhe Aleatët do ta zgjidhin!

S’ka zgjidhje nga jashtë. Zgjidhja do të vijë nga brenda, e bëri të qartë sot Kryetari i Partisë Demokratike, Lulzim Basha, në Shkodër pas takimit me Kryetaren në detyrë të Bashkisë, Voltana Ademi, dhe strukturat e PD Dega Shkodër, ndërsa foli për krizën që sipas tij është prodhuar nga bashkëpunimi i Edi Ramës me krimin dhe ajo mund të zgjidhet PD dhe Aleatët, duke e ndarë atë nga krimi.

“As Edi Rama dhe qeveria nuk kanë përgjigje për vendin dhe as për Shkodrën. Vendi ndodhet në udhëtim delikat dhe kritik. Ndaj ne si opozitë, PD dhe Aleatët, të bashkuar, kemi sot përgjegjësinë që t’i japim shqiptarëve zgjidhjen që e meritojnë. Kriza është prodhuar nga bashkëpunimi i politikës me krimin dhe ajo mund të zgjidhet duke e ndarë atë nga krimi.”

Betejën, tha Lulzim Basha, do ta vazhdojmë deri në fund për të çliruar Shqipërinë nga politika e lidhur me krimin.

“Proces zgjedhor pa garancinë se qytetarët nuk do të dhunohen, pa një transformim të thellë, nuk mund të ketë. Do të vazhdojmë betejën deri në fund për të çliruar Shqipërinë nga politika e lidhur me krimin. Ky është qëllim që bashkon gjithë shqiptarët e ndershëm.”

As Rama e as organizata e tij kriminale nuk kanë as përgjigje dhe as zgjidhje për Valdrin Pjetrin, Kajmakun, apo Babanin, tha lideri i opozitës dhe rruga e zgjidhjes së kësaj krize të jetë sa më e mundshme dhe e shkurtër.

“Kjo situatë e mundimshme ekonomike që është produkt i krizës ekonomike nuk mund të zgjasë dhe triumfi mbi të keqen nuk do të vonojë. Shkodra ka qenë dhe është simbol i pathyeshmërisë para të keqes,” tha Kryetari i Partisë Demokratike, Lulzim Basha duke e bërë të qartë në fund:

“S’ka zgjidhje nga jashtë. Zgjidhja do të vijë nga brenda. Jashtë kemi pasur miq, por kjo krizë nuk zgjidhet duke bërë viktimë apo duke parë nga qielli. Zgjidhet duke marrë në dorë fatet tona.”