Pas takimit Trump-Juncker, qetësohet euro – shpërthejnë bursat

Vlera e euros në tregun ndërkombëtar më në fund është stabël në kuotat shumë larg asaj çfarë po përjetonte në tri ditët e fundit, sepse frika nga lufta tregtare kishte shpërthyer pas fillimit të negociatave në mes të SHBA dhe BE për taksat doganore.

Kështu vlera e euros sot në mëngjes u rrit me 0.1 për qind, në 1.1738 dollarë, pasi që një ditë më parë ajo ishte rritur 0.4 për qind. Në prag të takimit të presidentit amerikan Donald Trump dhe atij të KE, Jean Claude Juncker, vlera e euros në një moment u ul dje në 1.1664 dollarë.

Indeksi i dollarit, i cili tregon vlerën e valutës amerikane ndaj gjashtë valutave tjera më të rëndësishme botërore, u ul për 0.25 për qind, në 94.131 pikë, që është edhe vlera më e ulët në dy javët e fundit.

Valuta britanike ndaj asaj amerikane ka ngelur gati e pandryshuar në krahasim me mbylljen e fundit, në 1.3202 dollarë. Mbështetje paundit i ofron pritshmëria e rritjes së mundshme të normave të interesit në mbledhjen e bankës qendrore britanike,  Bank of  England, e cila pritet të zhvillohet javën e ardhshme.

Gjithsesi, ndryshimi në kursin e euros ishte shumë pak i shprehur në krahasim me bursat, ku çmimet e aksioneve të industrisë automobilistike janë rritur për 2 për qind, ndërsa janë rritur edhe të ardhurat nga letrat me vlerë.

Aktualisht, tregu është fokusuar në mbledhjen e Bankës qendrore evropiane, ECB, vendimet e  së cilës priten të publikohen gjatë orëve të pas ditës.

Investitorët janë të interesuar për deklaratën e Maria Draghit për sinjalet e mundshme që ndërlidhen me dinamikën e normalizimit të politikës monetare në eurozonë.