Pasuesi i Engel, kongresmeni Meeks: Serbia duhet ta njohë Kosovën sa më shpejt!
Tre kongresmenë amerikanë të New Yorkut premtuan një riangazhim të fortë në ndihmë të Kosovës, në takim me aktivistët e komunitetit shqiptaro- amerikan në Manhattan, ku interes të veçantë zgjoi pjesëmarrja e kongresmenit Gregory Meeks, i cili ka zëvendësuar Eliot Engelin në postin e kryetarit të Komitetit të Punëve të Jashtme në Dhomën e Përfaqësuesve të Kongresit Amerikan.
“Serbia duhet ta njohë Kosovën sa më shpejt,” u shpreh Gregory Meeks.
“Nuk do të rreshtim deri sa të jetë një vend anëtar në OKB,” tha kryetarja e Komitetit të Mbikqyrjes dhe Reformës në Dhomën e Përfaqësuesve, Carolyn Maloney, duke quajt heronj shqiptarët e Amerikës për punën që kanë bërë në dekadat e fundit për Kosovën:
“Prej punës suaj sot ekziston një vend i ri në botë.”
Kongresmeni Mondaire Jones që përfaqëson një zonë në New York ku banojnë shumë shqiptarë, ka punuar në Administratën e Presidentit Barack Obama dhe konsiderohet si një nga yjet në ngritje të Partisë Demokrate, tha se po ndihej si mes miqsh të vjetër dhe ishte gati të punonte me komunitetin.
Botuesi i gazetës Vehbi Bajrami u dorëzoi kongresmenëve një dokument me 10 kërkesa të komunitetit për politikën e jashtme amerikane ndaj Kosovës dhe rajonit, ku kërkohet mbyllja e dialogut me njohjen e Kosovës nga Serbia, rritjen e ndihmës së jashtme për Kosovën, forcimin e ushtrisë së saj, braktisjen e idesë së asamblesë së komunave serbe, barazimin e të drejtave të pakicës shqiptare në Serbi, me atë të serbëve në Kosovë, ndërprerjen e pasivizimit të adresave shqiptare në Luginën e Preshevës, vendosjen e drejtësisë për krimet e luftës, nga përdhunimet te vrazja e vëllezërve Bytyçi, dëmshpërmblimet etj.
“Nuk ka asnjë vend ku Amerika është më popullore sesa në Kosovë”, tha ai, duke shtuar se Kosova duhet të bëhet për Shtetet e Bashkuara një “Izrael në Europës”.
Botuesi i gazetws “Illyria” u propozoi tre kongresistëve që të kryejnë një udhëtim në Kosovë dhe në në rajon për të mësuar më shumë për situatën, ku Kryetari i Komitetit të Punëve të Jashtme, Gregory Meeks i premtoi se vizita do të kryhej së shpejti.
Pjesëmarrësit në takim kishin ardhur nga shtete të ndryshme, si figura e njohur e komunitetit, Jim Xhema nga Connecticut, Marash Nucullaj nga Michigan e shumë të tjerë. Merrnin pjesë edhe Ambasadori i Shqipërisë në OKB, Ferit Hoxha dhe Ambasadori Frymëzim Isufaj që drejton Konsullatën e Kosovës në New York.
Takimi u organizua nga Vehbi Bajrami, botues i gazetës shqiptaro-amerikane “Illyria” dhe Elio Ahmetaj, pronar i restorantit të njohur “Allora”, ku u shtrua edhe darka. Takimin e drejtoi Christopher Hyland, njeriu që në vitin 1992, prezantoi komunitetin shqiptar me kandidatin e atëhershëm për President, Bill Clinton.
