Patrioti Edi Rama dhe e drejta e tij!

Me performancën patriotike të merr në qafë, madje nuk i mjafton as profili i Skenderbeut të Spiropalit, por kur Edi Rama bënë edhe në realitet patriotin me çështjen e Kosovës, të vjen për të vjellë!

E ka shumë me qejf të jetë mik shkau, madje edhe vëlla siç i thotë kriminelit Aleksandar Vuçiç, por harron se shqiptarët po e shikojnë dhe dëgjojnë, dhe nga dashuria që shpreh për UÇK-në dhe Hashim Thaçin, presin ta kaloj ylberin dhe t’iu thotë:

Kosova është Serbi!

Akuzoi rivalin politik Sali Berisha për bashkëpunim me kriminelin serb Arkan, duke e ngritur në këmbë impiantin e tij mediatik me akuza, tani akuzon rivalin politik Lulzim Basha me hetime për UÇK-në, por nga ana tjetër me mikun e shtrenjtë të Arkanit ai shkëmben letra dashurie.

“I dashur mister, jam Edi Rama, kryeministri i Shqipërisë, ish-lojtar i Kombëtares së basketbollit shqiptar dhe një admirues i vjetër i Sampdorias së Vujadin Boshkovit. E mora numrin tuaj të telefonit nëpërmjet mikut tonë të përbashkët, Aleksandar Vuçiç. Folëm për ju dje në mbrëmje këtu në Novi Sad. Kam dashur gjithnjë t’ju shprehja admirimin tim…” shkruan Edi Rama në letrën dedikuar mikut të Arkanit, Sinisha Mihajlloviç, që ky i fundit e publikoi në librin e tij.

Deri këtu, kultura e familjes së tij politike, si internacionale kriminale komuniste që është dhe e lejon, por jo ta bëjë edhe patriotin.

Sot kur libri i futbollistit serb, Sinisha Mihajlloviç, “La partita della vita”/ Lexo shqip: Ndeshja e jetës!/ është në treg, patrioti Edi Rama mund të thotë se nuk e dinte të kaluarën e “Zingaros”, siç e quajnë italianët, ama duhet ta dinte pse intelektualët e Bolonjës refuzuan ta shpallin qytetar nderi.

Para se ti shprehte dashurinë këtij krimineli duke i marrë numrin e telefonit, mikut tyre të përbashkët, Aleksandar Vuçiç, Edi Rama duhet ta dinte se intelektualët e Bolonjës protestuan dhe kërkuan nga ai që të paktën të heq dorë nga miqësia me kriminelin serb Zhelko Razhnatoviç Arkan.

Sinisha Mihajlloviç as këtë nuk e bëri! Në një intervistë për “Corriere dello Sport” e cila kishte për qëllim dhe promovimin e librit të tij, Mihajlloviç ka sqaruar marrëdhënien e tij me Arkanin.

Ndërsa në rrëfim e tij për “Gazzetta dello Sport” ai ka sqaruar në detaje marrëdhënien me mikun e tij, kriminelin serb tashmë të vrarë Zhelko Razhnatoviç Arkan dhe çfarë nuk mohon dot:

“Mamaja ime është kroate, babai serb. Kur u transferuan nga Vukovari në Beograd, mamaja e thirri vëllain Ivon dhe i tha të vijnë në shtëpinë ton. E daja im i tha:

Pse e largove burrin? Ai është një derr serb dhe duhej të qëndronte këtu që ta therim në fyt. E tillë ishte klima në atë kohë,” tha Mihajlloviç duke konfirmuar me këtë rast se Arkanin e kishte mik:  

“I kam kushtuar një tekst. Ishte miku im, ishte kreu i tifozëve të Crvena Zvezdës. Gjithmonë është sjellë mirë ndaj meje, lojtarëve, klubit dhe përfaqësueses së Serbisë. Ai madje e kapi dajën tim Ivon dhe e shpëtoi. Deshën ta vrasin, por Arkani nuk i la. Më thirri menjëherë në telefon,”  tha Mihajlloviç duke e pranuar se shumë shpesh ka folur me Arkanin.

Nuk e mohon se Arkani nuk ishte shenjtor, dhe ndonëse është nga qyteti i Vukovarit ku serbët kanë bërë masakrat më të tmerrshme që nga lufta e dytë botërore, ai refuzon ta fajëson popullin serb për krimet në Ish-Jugosllavi.

“Kam karakter të fortë. Jam serb nga koka te këmbët, me të gjitha të mirat dhe të këqijat të popullit tim krenar. Di të pranoj gabimet, ti të pranoj dhe të kërkoj falje dhe jam i gatshëm për dialog. Më konsiderojnë njeri të fortë. Kjo është e vërtetë. Më mirë, mos të më provokojnë. Por edhe njeriu me koqe mund të preket. Kur shkova për të parë në Megjugorje, kam qarë si fëmijë, nuk i ndaloja dot lotët. U ndjeva më i fortë. Më njeri isha atë ditë se kurrë më parë,” tha në rrëfimin e tij Sinisha Mihajlloviç.

Për ata që nuk duan të dinë si Edi Rama, Zhelko Razhnatoviç Arkan ishte i dërguari i Presidentit të Serbisë, Sllobodan Millosheviç, me paramilitarët e tij në fushëbetejat e Kroacisë, Bosnjes dhe Kosovës, për të realizuar projektin e spastrimit etnik, të cilin ky kriminel, për fat të keq, e ka realizuar me shumë sukses duke mahnitur edhe kriminel serb si Sinisha Mihajlloviç.

E Kryeministri Edi Rama i shkruan Sinisha Mihajlloviçit se kanë mik të përbashkët Aleksandar Vuçiçin.

Në fund, Sinisha Mihajlloviç mund të mohoj çdo gjë ose të pranoj çdo miqësi që ka në këtë botë, por ata që i thonë bukës – bukë, dhe ujit –ujë, e dinë që “miku i mikut, është miku juaj”!

Pra, Arkani, miku i Mihajlloviçit është miku i Edi Ramës! Ta gëzojnë!   

Por, dokrrat me kasetat e BBC, Dash Pezës, Taulant Ballës dhe patriotë të ngjashëm, Edi Rama nuk i shet dot sikur mos të ekziston fare as libri “La partita della vita”!

Mesazhi i plotë i Edi Ramës për Sinisha Mihajlloviçin:

“I dashur mister, jam Edi Rama, kryeministri i Shqipërisë, ish-lojtar i Kombëtares së basketbollit shqiptar dhe një admirues i vjetër i Sampdorias së Vujadin Boshkovit. E mora numrin tuaj të telefonit nëpërmjet mikut tonë të përbashkët, Aleksandar Vuçiç. Folëm për ju dje në mbrëmje këtu në Novi Sad.

Kam dashur gjithnjë t’ju shprehja admirimin tim për egërsinë me të cilën po përballoni armikun tuaj më të frikshëm të jetës, por edhe për t’ju thënë se pasi keni mundur shumë portierë direkt nga goditjet e dënimit, ju me siguri jeni i zoti të mundni edhe hijen që është vendosur mes jush dhe portës tuaj të së ardhmes.

E di shumë mirë rrezikun që mesazhe të tilla solidariteti mund të bëhen të mërzitshme për një kokëfortë si puna juaj, por ju siguroj se ky i imi nuk është një mesazh i kësaj natyre. Përkundrazi, është shprehje e një admirimi antik.

Ju kërkoj ndjesë që nuk arrita t’ju shpreh më mirë ndjenjën e vlerësimit të lartë dhe simpatisë kundrejt jush, por nëse do të duhej një dëshmitar, atëherë miku ynë i përbashkët mund t’ju sigurojë se, tashmë prej vitesh, nuk ndodh asnjëherë që të mos flasim për ju si një figurë speciale në botën e futbollit.

Duke ju uruar gjithë të mirat juve dhe të dashurve tuaj, nuk po ju bezdis më me shpresën se një ditë do të mund t’ju takoj personalisht. ER.”