PD dhe Aleatët nuk janë opozitë e Edi Ramës por armiq!

Pas 30 Qershorit një re dëshpërimi ra mbi opozitën. Si do bëhet tani, është pyetja e rëndomtë që të parashtrohet ndër opozitar, pasi parashikimi i Institutit Ndërkombëtar për Studime të Lindjes së Mesme dhe Ballkanit, IFIMES, për Edi Ramën, “Millosheviçin shqiptar” po bëhet realitet. Dhe, a ka zgjidhje, para se të realizohet edhe epilogu i këtij parashikimi: Edi Rama do ta çoj Shqipërinë në luftë civile!        

nga Agim Popoci

“Ne për ta nuk mund të jemi opozitë, ne jemi  automatikisht armiq!” Kështu është shprehur Ibrahim Rugova në një intervistë për të përditshmen kroate “Slobodna Dalmacija më 8 Tetor 1989, kur diktatori Sllobodan Millosheviç kishte pushtuar gjithçka në Kosovë, madje Dr.Rugova, kur autoritetet kriminale edhe shoqatën e gjuetarëve e kishin marrë nën kontroll, u kishte kërkuar të tregohen pak elastik, të lejojnë të paktën ekologjistët të veprojnë. Por as për këtë nuk janë të gatshëm, konstaton Ibrahim Rugova në intervistën e cila ndonëse bëhej para shpërthimit të luftërave në Ish-Jugosllavi paralajmëronte një skenar të frikshëm.   

Në prag të zgjedhjeve të 30 Qershorit, Instituti Ndërkombëtar për Studime të Lindjes së Mesme dhe Ballkanit, IFIMES, në Lublanë, duke gjykuar veprimin politik të Kryeministrit të Shqipërisë, Edi Rama, konstaton se ai gjithnjë e më shumë të kujton “Millosheviçin shqiptar” dhe paralajmëron se situata aktuale në Shqipëri është shumë shqetësuese sepse qysh tani ka shenja të një lufte të mundshme civile.

Sot, pas 30 Qershorit, situata është shumë më shqetësuese se sa e kishte parashikuar Instituti Ndërkombëtar për Studime të Lindjes së Mesme dhe Ballkanit, IFIMES, dhe çuditërisht tek Edi Rama shohim po atë Millosheviçin me të cilin u përballë Dr.Rugova.

“Millosheviçi shqiptar”

Kur Edi Rama filloi pushtimin e institucioneve sapo erdhi në pushtet gjithçka dukej normale nga opinioni komunistë me idenë se kishte marrë 1 milionë vota siç propagandonte Kryeministri. Arrestoi Guvernatorin Fullani dhe të gjithë u ekzaltuan por asnjëri nuk e hapi gojën kur ky njeri u shpallë i pafajshëm dhe  me paratë e shtetit u dëmshpërblye, ndërkohë që Rama e kishte zëvendësuar me njeriun e vet.

I futi draprin dhe çekanin institucioneve shëndetësore, mblodhi profesorë dhe doktorë në një sallë, i bëri për dy lekë dhe zgjodhi shefa repartesh nëpër spitale ata komunistë që i kishin mbajt ison para, gjatë dhe pas qeverisjes së Saliut.

Shkarkimi i drejtorit të Bibliotekës Kombëtare ishte më komiku, madje shumë më tragjikomik se ai i Teatrit. Në krye të Bibliotekës Kombëtare gjeti njeriun që e kishte emëruar kur ishte Ministër i Kulturës, por tashmë për Edi Ramën ishte njeriu i Saliut, meqë ai nuk e kishte shkarkuar!

“Millosheviçi shqiptar” kishte në listën e tij edhe shumë të tjerë por e kishte ndarë mendjen se Shefin e SHIK-ut dhe Kryeprokurorin duhej hequr se s’bënë ndonëse mandati i tyre kushtetues i krijonte  ca probleme. Shefin e SHIK-ut e sistemoi ndërsa Kryeprokurorin e degjeneroi në mënyrë paksa më të rafinuar se sa Guvernatorin.   

Por, votimi në Parlament i Kryeprokurores së Përgjithshme, Arta Marka, nga Edi Rama në mënyrë antikushtetuese dhe nën tym e flakë, ishte një ogur i cili jo për drejtësinë shqiptare por për gjithë Shqipërinë.

Teoria “më mirë djepi bosh, se shejtani brenda” të cilën e propagandonte vetë Kryeministri Edi Rama rezultoi një idiotizëm “par excelence” sepse ishte shejtani dhe jo Ligji, ai i cili i nxori prokurorët dhe gjyqtarët nga djepi i drejtësisë dhe i zëvendësoi as me qenie të mbinatyrshme, as me brirë, as me thundra e me bisht, as mishërim i së keqes dhe i ngasjes për punë të liga, por thjeshtë me servil dhe militantë komunistë. Gjithçka që pasoi kishte për model “Millosheviçin në Kosovë” duke shkuar po aq larg, siç thoshte Dr.Rugova, “e morën edhe Shoqatën e Gjuetarëve”.

Koalicioni qeverisës kriminal që largoi Sali Berishën i mundësoi Edi Ramës ta sjellë në krye të Parlamentit të Shqipërisë edhe ministrin e Brendshëm të Enver Hoxhës, Gramoz Ruçin. Për Ilir Metën dhe militantët komunistë ishte e drejtë e mazhorancës parlamentare por për Shqipërinë një tranzicion me kthim pas, me një koalicion qeverisës që nuk ka as edhe një njeri të hajrit ta ulë në krye të Parlamentit, por merr një ministër që ishte pjesë e regjimit të zhytur deri në gju me gjak.

Ilir Meta Kryetar i Parlamentit ose President asgjë nuk ndryshoi në jetën parlamentare sepse atë e diktonte Edi Rama. Opozita vazhdoi të mos përfillet në Parlament dhe ajo u detyrua të heq dorë nga parlamentarizmi i Edi Ramës; e ky i fundit për ti treguar opozitës se kush është më i forti, vuri dorë edhe aty ku nuk mendohej, mbi KQZ, mbi Universitet, mbi organet e sapoformuara të Drejtësisë nën mbikëqyrjen ndërkombëtare, KLGJ dhe KLP, për ti vënë qershinë mbi tortë me Kryetarin e Akademisë së Shkencave, përsëri një ministër të Enver Hoxhës, Skender Gjinushin.

Jo opozitë, armiq!

Shtyrja e zgjedhjeve vendore në Shqipëri, e përcaktuar më 30 Qershor, është e pashmangshme, theksonte analiza e  Institutit Ndërkombëtar për Studime të Lindjes së Mesme dhe Ballkanit, IFIMES, në Lublanë! Por as këtë nuk e përfilli Edi Rama ashtu si edhe rrugën drejtë stabilizimit të situatës në Shqipëri që e propozonte IFIMES me formimin e një qeverie tranzitore, e cila do të përgatitë terrenin për zgjedhje të lira dhe të ndershme, në të kundërtën, theksonte analiza e këtij Instituti, Edi Rama do ta çoj Shqipërinë në luftë civile!

Përgjimet e publikuara nga gazeta gjermane “Bild” ku konfirmohet se regjimi i Edi Ramës nuk i ka manipuluar por i ka blerë dhe i ka vjedhur zgjedhjet, u mendua se po kanalizonte rrugën drejtë asaj që propozonte IFIMES ashtu si edhe mundësia që i ofroi Ramës, Ilir Meta, me anulimin e datës së zgjedhjeve 30 Qershor që u botua në Fletoren Zyrtare ndonëse ishte në kundërshtim me kërkesat e opozitës. Por, JO! Edi Rama ishte i vendosur, zgjedhjet e tij ai do ti mbaj më 30 Qershor.  

Përveç faktit që ishte garë me vetëm një kandidat,  mënyra se si u zhvilluan zgjedhjet e Edi Ramës më 30 Qershor, është pika që derdhi gotën e regjimit kriminal të Edi Ramës; E solli Shqipërinë në Kosovën e vitit 1989, ku PD dhe Aleatët më nuk mund të jenë opozitë, janë automatikisht armiq!

Jo vetëm pse analistët e IFIMES, opozitën shqiptare e shohin si më shtetformuesen nga të gjitha opozitat në rajon, e cila, siç theksojnë, kundërshton fuqishëm regjimin e urryer të Edi Ramës, por Kryeministri Edi Rama me gjithë këtë pushtet, me të gjitha institucionet në grusht, me të gjitha 61 bashkitë nën thundër dhe pas pak ditësh edhe Presidentin komunist, ai më nuk është rrezik vetëm për Shqipërinë.

Zgjidhja pa Edi Ramën

Pas 30 Qershorit një re dëshpërimi ra mbi opozitën. Si do bëhet tani, është pyetja e rëndomtë që të parashtrohet ndër opozitar, por meqë strategjia e Edi Ramës është kryekëput me atë të Millosheviçit, PD dhe Aleatët e saj duhet të ndjekin deri në fund po atë strategji që e rrëzoi këtë kriminel i cili e përmbyti gjithë Ballkanin në gjak!

Kur Sllobodan Millosheviç vuri dorë mbi Kushtetutën dhe gjithçka që ishte e Kosovës, shqiptarët e Kosovës u detyruan të organizohen me një pushtet paralel dhe të organizojnë zgjedhje në mënyrë që ky pushtet ta ketë legjitimitetin e popullit.

U zhvilluan zgjedhjet, mund të thuhet ndoshta edhe më demokratike ndonjëherë dhe kishte mbikëqyrje ndërkombëtare ndërsa përballë regjimin kriminal të Millosheviçit i cili tashmë ishte më i fortë se kurrë dhe kishte filluar luftë në Slloveni dhe Kroaci.

PD dhe Aleatët sot e kanë shumë më të lehtë se Kosova, LDK dhe Ibrahim Rugova. Shqipëria ka një datë të dekretuar nga Presidenti i Republikës, 13 Tetor!

Zgjedhjet kriminale të 30 Qershorit konfirmuan se Partia Socialiste në krye me Edi Ramën nuk i do zgjedhjet e lira dhe të ndershme, dhe për hir të 85%  të popullsisë që e refuzoi këtë mënyrë të qeverisjes së vendit, opozita duhet të organizoi zgjedhje model jo vetëm për ti dëshmuar Edi Ramës se si bëhen zgjedhjet por për të konfirmuar dhe atë që IFIMES e ka konstatuar pas një analize të hollë që i ka bërë zhvillimeve në Shqipëri: Opozita shqiptare është më shtetformuesja nga të gjitha opozitat në rajon!

Opozita shqiptare, duhet të kujdes që zgjedhjet e 13 tetorit pa menaxhuesin Edi Rama dhe sejmenin e tij Denar Biba të jenë pa imponim në mënyrë që votat e pavlefshme të mos bëhen fenomen i zakonshëm kur votojnë shqiptarët.

A do të ketë obstruksion nga ana e Partisë Socialiste për ti zhvlerësuar këto zgjedhje?! Natyrisht se po, por këto zgjedhje përveç se një garë e vërtetë ku do të ketë më shumë se një kandidat, mund të jenë edhe zgjedhjet e para pluraliste ku vota e qytetarit do të lexohet pa kurrfarë presioni të pushtetit dhe krimit të organizuar.  

A është e lehtë?! Natyrisht se jo, por për momentin ngelet rruga e vetme para se ti lejohet Edi Ramës të vazhdoi terrorin policoro-ushtarak dhe të realizohet parashikimi i Institutit Ndërkombëtar për Studime të Lindjes së Mesme dhe Ballkanit, IFIMES, në Lublanë, i cili deri më tani, për fat të keq, rezulton shumë i saktë dhe ka ngelur vetëm epilogu:

Edi Rama do ta çoj Shqipërinë në luftë civile!