PD mbledh grupin parlamentar/ Kërkohet bojkoti i Parlamentit

Partia Demokratike ka mbledhur grupin parlamentar ku po diskutohet qëndrimi që do të mbajë kjo parti ndaj Parlamentit.

Burime nga PD bëjnë të ditur se kryefjala e mbledhjes është nëse deputetët demokratë duhet të bojkotojnë Kuvendin, apo duhet të vijojnë të bllokojnë punimet e tij, sikundër ka ndodhur gjatë seancave të fundit.

Deputeti Flamur Noka gjatë fjalës së tij është shprehur se “PD duhet të shkëputet nga Parlamenti”.

“Ne duhet të shkëputemi nga ky parlament. Ramës i dhamë kohën e duhur për çështjen Xhafaj. Hapi i vetëm që na mbetet është bojkoti. Duhet të shkëputemi nga ky parlament”, është shprehur ai. Sipas Nokës, zgjedhje me qeverinë Rama nuk mund të ketë.

Të njëjtin qëndrim ka mbajtur edhe Klevis Balliu, sipas të cilit qytetarët u kërkojnë të mos jemi në parlament.

Bojkotin e ka mbështetur edhe deputeti Bardh Spahia, duke u shprehur se ky opsion duhet të merret në konsideratë.

Ndërkohë ish-Kryeministri, Sali Berisha, tha se bojkoti i Kuvendit dha rezultat në rastin e dekriminalizimit. Ai tha se duhet të shihet hap pas hapi situata.