PD nuk humbi Avokatin e Popullit, por, opozitarin konservator!
nga Agim Popoci
E zhvendosur nga boshti, si për shkak të propagandës së fortë komuniste të Edi Ramës ashtu dhe paaftësisë për tu përballur me një politikë të fuqishme antikombëtare, Partia Demokratike u fik kur Partia Socialiste zgjodhi Avokatin e Popullit me firmat e dhëna nga 35 deputetët e saj!
Ndonëse Partia Demokratike nuk e humbi Avokatin e Popullit sepse nuk e kishte kurrë që nga krijimi i këtij institucioni, PD u përfshi në një kaos pasi Edi Rama me lojën e tij të pistë politike publikoi dhe emrat e deputetëve demokratë që kishin mbështetur propozimin e një llumi komunist si Endrit Shabani!
Reagimi i PD dhe lidershipit të saj dëshmoi një zhvendosje tashmë shqetësuese nga boshti, pasi fillimisht u pranua si humbje e madhe dhe nga ana tjetër filloi të relativizohet me kërkimfalje edhe dhënia e firmës për një llum komunist për të kandiduar për Avokat të Popullit! Dhe, për gjithë këtë mosmenaxhim të situatës, PD nuk reflektoi por akuzoi Edi Ramën dhe mediat që ai kontrollon se po zhvendosin vëmendjen nga skandali i fundit me Zv/Kryeministren Belinda Balluku pasi Gjykata Kushtetuese i dha të drejtën e kthimin në detyrë edhe pse akuzohet nga SPAK për vjedhjen e 210 mln eurove!
Humbja e Avokatit të Popullit kërkonte një sqarim nga lidershipi demokrat pavarësisht misionit, për tu kuptuar pse nuk është humbje por si gjithmonë plaçkitje, të vetmen gjë që bë bënë komunistët që nga dita e parë e pushtimit në vitin 1945, duke mbyllur kështu këtë kapitull, ndërsa prezenca e firmave të deputetëve të PD për një llum komunist kërkonte përgjegjësi dhe vënien e gishtit në plagë; Plagë e cila ka filluar dhe po qelb këtë parti me histori shtetformuese!
Kur filloi mrekullia politike e Sali Berishës për Rithemelimin e Partisë Demokratike, vetë ideatori i saj nuk ishte i kujdesshëm ose nuk e pranoi konservatorizmin si domosdoshmëri për këtë Rithemelim për shumë arsye ndërsa u vërejt arsyeja madhore që tashmë po i bien kokës, Bashkimi i PD!
Shumë mendimtarë konservatorë e kanë thënë kohë më parë se liberalizmi është një kalë troje i totalitarizmit, kalë ky i cili e gjunjëzoi Partinë Demokratike para se të nxjerrë kokën regjimi i Edi Ramës!
Duke lejuar shkatërrimin e autoritetit tradicional, dobësimin e strukturës shoqërore, inkurajimin e shfaqjes së masave dhe shtypjen e individualitetit, Partia Demokratike nuk u Rithemelua por u Transformua në një parti pa opozitar konservator, duke shpërfillur kështu vlerën më të madhe që ka kombi shqiptar, edukatën konservatore, e cila ka bërë dhe bënë dallimin në mes të pushtetit dhe autoritetit!
Kështu iu hap rruga Edi Ramës për një sundimtar totalitar, pasi lidershipi demokrat shpërfilli dhe postulatin shumë domethënës të Robert Nisbet, se pushteti është thjesht zbatimi i forcës pa pëlqim, i cili ndodh si në diktatura ashtu edhe në demokracitë egalitare.
Ndërsa Autoriteti bazohet në pëlqimin dhe detyrimin, dhe nuk lind nga kontratat midis individëve të lirë, por përkundrazi zhvillohet natyrshëm, si pjesë e formës natyrore të jetës shoqërore që nuk mund të ndryshohet nga asnjë formim i derivuar, ashtu siç kanë prindërit autoritet mbi fëmijët pa ndonjë kontratë ose marrëveshje paraprake, është konfirmuar shkencërisht se kjo zhvillohet nga domosdoshmëria natyrore dhe është i rrënjosur në natyrën e shoqërisë dhe në të gjitha institucionet, që fatmirësisht e gjejmë në shumicën e familjeve shqiptare, por, që fatkeqësisht PD e krijoi idenë se, nuk i duhet.
Për konservatorët, struktura natyrore e shoqërisë është hierarkike. Pabarazitë shoqërore janë një pasojë e pashmangshme e strukturës së shoqërisë bazuar në pabarazitë natyrore, ashtu si truri, zemra dhe mushkëritë kryejnë funksione të ndryshme brenda trupit, ashtu edhe klasat dhe grupet e ndryshme që përbëjnë shoqërinë kanë rolet e tyre specifike, dhe pikërisht në këtë formë është pranuar ndër shqiptarë!
Por, jo, konservatorizmi në PD nuk është larguar as nga dera por me nxitim, nga dritarja, duke u konsideruar si një e keqe për botën moderne!
Pikërisht, kjo zhvendosje nga boshti i PD i mundësoi edhe terroristëve të 8 Janarit, të tmerruar nga rreziku i rikthimit të konservatorizmit, ti japin dhe goditje të fortë Partisë Demokratike pa pasur qoftë dhe një mendjendritur t’i sqaroi atë që thotë konservatori modern, Michael Oakeshott! Qeveria nuk duhet të shqetësohet për atë që është moralisht e drejtë dhe e gabuar, detyra e saj nuk është t’i bëjë njerëzit të mirë ose edhe më të mirë, nuk është e nevojshme për shkak të ndonjë shthurjeje natyrore të njerëzimit, por, thotë Oakeshott, thjesht për shkak të tendencës së vazhdueshme të njerëzve për të qenë të çuditshëm.
Konservatorët e hedhin poshtë politizimin dhe përfshirjen e masave në qeverisjen e shtetit, qytetarët janë si fëmijë brenda një familjeje, ata kanë nevojë për udhëzim dhe disiplinë, gjë që shqiptarët e kanë të rrënjosur në vetëdijen e tyre, vetëm ju duhet një organizim ose më saktë një riorganizim rreth PD-së së përbashkuar!
Ndërkohë të pabindurit e konservatorizmit si domosdoshmëri në Partinë Demokratike, që rrinë e shajnë gjatë gjithë kohës në rrjetet sociale lidershipin demokrat pse Edi Rama vjedhë, duhet sqaruar se nga fundi i Mesjetës “conservatio” hyri në gjuhët evropiane me kuptimin “të ruash diçka nga korrupsioni ose shkatërrimi”, në kthesën e madhe të shekujve XVIII dhe XIX, termi u përdor në anglisht në kuptimin politik të ruajtjes së rendit politik ekzistues, por, si ideologji, konservatorizmi u formua në shekullin e XIX-të, në konflikt me liberalizmin dhe socializmin!
Në esenë e tij “Konservatorizmi si ideologji”, Samuel Huntington në vitin 1957 argumenton se konservatorizmi është një sistem idesh që shërbejnë për të mbrojtur institucionet e vendosura kur ato janë nën sulm të plotë, dhe, shfaqet në histori vetëm në kohë trazirash të mëdha politike.
Kur themelet e shoqërisë kërcënohen, ideologjia konservatore u kujton njerëzve domosdoshmërinë e disa institucioneve dhe dëshirën e të tjerëve, kjo shpjegon dhe sjelljen e disa liberalëve të cilët, përballë sulmeve ndaj liberalizmit nga radikalët e së majtës, zhvillojnë një mbrojtje konservatore të institucioneve të tyre liberale. Vetë Edmund Burke ishte një liberal Whig, por, dhe kritiku i parë dhe më i madh i Revolucionit Francez, ndërsa sot konsiderohet babai i konservatorizmit modern, i cili ndër vite ka shtjelluar pse idetë dhe politikat revolucionare janë një subjekt i vazhdueshëm kundërshtimi nga konservatorët.
Konservatorizmi është në thelb anti-individualist, duke theksuar grupin mbi individin, ajo që sot më së shumti i duhet Partisë Demokratike ashtu si dhe çdo
pjesë e kësaj shoqërie organike, familja, feja, qeveria, që kanë një rol të veçantë në funksionimin e shoqërisë dhe pasqyrojnë shëndetin e saj, dhe, gjëja më e rrezikshme është të ndërhysh në rrjedhën natyrore të gjërave.
Për Burke, feja është spiranca e njeriut në këtë botë ndryshe të pakuptueshme dhe për këtë arsye armiqësore, është një konstruksion moral, ndërsa Prona ka një arsye madhore pse duhet të rikthehet si kryefjalë në PD!
Ëshët dëgjuar shpesh nga terroristët e 8 Janarit hakërrima për Pronën, që konfirmon dhe pushtetin e liberalëve në PD dhe hapjen e krahut nga konservatorët! Por, përcaktimi shkencor thotë se Liberalët e konsiderojnë pronën të rëndësishme për zhvillimin e individit ndërsa Konservatorët shtojnë se pa sigurinë e pronës, askush nuk mund të ketë pritje të besueshme për të ardhmen, rendi bëhet i pasigurt dhe mundësia e anarkisë rritet.
“Është shumë më e lehtë të ngulitet një ndjenjë e rëndësisë së rendit tek çdo qytetar nëse ai ka një pjesë në shoqëri përmes pronës së tij. Dhe ajo pjesë nuk ka kurrë peshë në vetëdijen dhe ndërgjegjen e individit, përveç nëse është pronë në formën e tokës ose ndonjë prone tjetër të paluajtshme,” thotë Burke.
Në fund, në analizën e Samuel Huntingtonit ka disa pika problematike ndoshta edhe për kohën kur është shkruar, 1957, gjithësesi ajo tregon një bosht thelbësor të ideologjisë konservatore, themelet e shoqërisë, që çdo opozitarë i pakënaqur nga lidershipi aktual i Partisë Demokratike e ka, dhe sërish i duhet PD-së jo vetëm për të larguar bandën komuniste të Edi Ramnës nga pushteti: idenë e mbrojtjes së rendit kushtetues, autoritetin, institucionet e vendosura në vend të vetë dhe traditën!
