PDK, LDK dhe Nisma kërkojnë rinumërimin e votave. Pritet vendimi i PZAP!
Pak para përfundimit të procesit të numërimit të votave Lidhja Demokratike e Kosovës, Partia Demokratike e Kosovës dhe Nisma Socialdemokrate, kanë kërkuar rinumërimin e të gjitha votave, në nivel vendi. Në Panelin për Ankesa dhe Parashtresa, PZAP, është thënë se në një afat lirgjor prej 72 orësh, do të dilet me një vendim në lidhje me kërkesat e disa subjekteve politike për rinumërimin e votave, raporton RFE.
Duke pretenduar se ka disa probleme teknike, PDK dhe LDK po kërkojnë kthimin e procesit të numërimit në pikën zero.
Ilir Gashi, anëtar i Komisionit Qendror të Zgjedhjeve nga Partia Demokratike e Kosovës, tha për RFE se rinumërimi i votave duhet të ndodh për faktin se formularët dhe disa vota të partive nuk janë shkruar në formularët përkatës.
“Realisht ne kemi kërkuar të numërohen votat e PDK-së, sepse votat tona në të gjithë formularët e vendvotimeve janë bartur te një parti tjetër”, tha Gashi duke shtuar se për shkak të këtij gabimi nuk mund të shkruhet saktë rezultati përfundimtar.
Edhe zyrtarët e Lidhjes Demokratike të Kosovës, kanë konfirmuar për se kanë kërkuar rinumërimin komplet të votave, pasi dyshohet në gabime të ndryshe.
Nënkryetari i LDK-së, Lutfi Haziri, tha për RFE se për të qenë në rregull në aspektin juridik, rinumërimi i votave është i domosdoshëm.
“Kemi kërkuar rinumërim sepse ka qenë një problem teknik që i atribuohet KQZ-së lidhur me procesverbalet e numërimit të votave. Një parti e listuar dhe pjesëmarrëse në garë nuk ka figuruar fare në listë. Ky problem duhet të zbardhet deri në fund për të parë pastaj se si kanë dalur procesverbalet dhe a ka rregullshmëri në renditjen e partive dhe numrave,” tha Haziri duke shprehu bindjen e tij se edhe nëse ndodh rinumërimi i votave nuk do të ketë ndryshim të rezultatit aktual.
“Nuk presim që do të ketë impakt [ndikim] në rezultat, por do të ketë vetëm legjitimitet të procesit”, tha Haziri.
Kurse, në Lëvizjen Vetëvendosje thonë se mbështetësit e këtij subjekti politik duhet të jenë të qetë, pavarësisht kërkesave për rinumërim të votave.
“Qëndroni të qetë, mos u shqetësoni. Ne kemi personat përgjegjës që janë gardianët e vullnetit të qytetarëve. Padyshim subjektet që nuk kanë marrë mbështetjen nga qytetarët, tentojnë të gjejnë shpëtim nga rinumrimi,” thekson Albulena Haxhiu nga Lëvizja Vetëvendosje.
Ndryshe, pas numërimit të 100 të votave, sipas KQZ, Lëvizja Vetëvendosje doli e para me 25.49 për qind përkatësisht 202.968 vota e pasuar nga Lidhja Demokratike e Kosovës me 24.83 për qind përkatësisht 197.202 vota ndërsa PDK u radhitë e treta me 21.25 për qind me 169.211 vota. Ndërkohë Nisma Socialdemokrate ngeli jashtë parlamentit me 4.96 për qind pëkatësisht 39.495 vota.
Të dielën, më 6 tetor, në Kosovë u mbajtën zgjedhjet e parakohshme parlamentare. Bazuar në raportimet nga vëzhguesit vendorë dhe ata ndërkombëtar, procesi kaloi qetë dhe ishte në harmoni me standardet demokratike.
