Përballja Osmani-Vuçiç, Këshilli i Sigurimit mban sot seancë për Kosovën

Këshilli i Sigurimit i Kombeve të Bashkuara sot mbanë seancën e radhës për Kosovën. Presidentja e Kosovës, Vjosa Osmani, do ta përfaqësoj Kosovën ndërsa përballë saj në Këshillin e Sigurimit do të shfaqet presidenti i Serbisë, Aleksandër Vuçiç.

“Në seancën e KS të OKB-së, Presidentja Osmani pritet të flasë për progresin, zbatimin e reformave, të drejtat e njeriut, demokracinë, sundimin e ligjit si dhe fusha të tjera me rëndësi për Kosovën. Presidentja poashtu do të flasë për domosdoshmërinë për drejtësi për krimet e kryera nga Serbia në Kosovë,” thuhet në njoftimin e Presidencës së Kosovës.

Përgjatë qëndrimit në New York, thekson Presidenca e Kosovës, Vjosa Osmani pritet të takohet e koordinohet me disa nga përfaqësuesit e përhershëm të shteteve mike në Kombe të Bashkuara.

Ndërsa, Vuçiç është shprehur se Serbia do t’i vazhdojë përpjekjet e saj, pavarësisht poshtërimit që i është bërë deri më tani. 

“Ne do të vazhdojmë të luftojmë për Serbinë, për popullin tonë, për jetën dhe të ardhmen e fëmijëve tanë, që të shkojmë me kokën lart, pa marrë parasysh se ata u përpoqën të na poshtërojnë me dhunë.” është shprehur Presidenti i Serbisë, Aleksandar Vuçiç përmes rrjetit social.

Ndryshe, seanca e Këshilli të Sigurimit të Kombeve të Bashkuara fillon në orën 16:00, sipas kohës tonë lokale, respektivisht në ora 10:00, sipas kohës së New York-ut.