Përmbyllet procesi, PD: Kryetari Lulzim Basha mori listën e kandidatëve për deputetë

Me përmbylljen e procesit për përzgjedhjen e kandidatëve për zgjedhjet e ardhshme parlamentare dhe vendore, Partia Demokratike bënë të ditur zyrtarisht se Komisioni i vlerësimit të Kandidatëve i ka dorëzuar Kryetarit të PD, Lulzim Basha, listën me emrat e 326 kandidatëve të përzgjedhur për deputetë.

“Komisioni e ndau punën në 3 faza: nga 03 gusht 2020 deri ne 22 tetor 2020. Pas një pune intensive dhe voluminoze komisioni përfundoi vlerësimin për 3593 kandidatë të propozuar, në një listë përfundimtare prej 326 kandidatësh të propozuar për përfaqësim politik në zgjedhjet e ardhshme politike apo lokale.

Komisioni, i dorëzoi sot Kryetarit dhe Sekretarit të Përgjithshëm të PDSH, listën përfundimtare të kandidatëve për ndjekjen e procedurave të mëtejshme sipas Statutit,” thuhet në njoftim ndërsa falënderohet anëtarësia për pjesëmarrjen masive në votime, strukturën e PD-së, përfaqësuar në këtë proces përzgjedhjeje nga Sekretariati teknik, si dhe kandidatët e propozuar që ndihmuan realizmin e këtij procesi transparent, qytetar dhe të përgjegjshëm.

Në fund, Komisioni i vlerësimit të Kandidatëve konstaton se ky proces i zhvilluar për herë të parë në Shqipëri, është vlerësuar pozitivisht nga anëtarësia e PD-së, opinioni publik dhe mediat. Komisioni e vlerëson procesin në tërësi si një akt emancipues në politikën shqiptare.

Pas dorëzimit të kësaj liste, tani është Kryesia e PD që zgjedh 140 kandidatë që do të garojnë në zgjedhjet e 25 Prillit. 80% e kandidatëve në listën finale do të jenë nga kjo listë me 326 emrat ndërsa Kryetari dhe Kryesia kanë të drejtë të propozojnë deri në 20% të emrave për listën finale.