Shkeli 5 Qershorin, Meta kthen Kodin Zgjedhor dhe i drejtohet “Venecias”

Presidenti i Republikës, Ilir Meta, i ka kthyer parlamentit Ligjin për Kodin Zgjedhor, pasi Kryeministri Edi Rama shkeli Marrëveshjen e 5 Qershorit duke cenuar parimin e procesit të rregullt ligjor, si dhe të drejtën për të zgjedhur e për t`u zgjedhur.

“Ndryshimet e njëanshme në Kodin Zgjedhor të datës 5 tetor 2020, cenojnë parimin e procesit të rregullt ligjor, si dhe të drejtën për të zgjedhur e për t`u zgjedhur, e mbi të gjitha parimin e barazisë së votës,” thuhet në arsyetimin e Presidentit ndërsa bëhet e ditur se në 21 tetor iu drejtua Komisionit të Venecias për një opinion të specializuar mbi këtë proces.

“Si President i Republikës, në datën 21 tetor 2020, i jam drejtuar me një kërkesë urgjente Komisionit Europian për Demokraci përmes Ligjit (Komisionit të Venecias) për një opinion të specializuar dhe objektiv mbi këtë proces.”

Ndryshe, Parlamenti i Shqipërisë me 97 vota për, miratoi ndryshimet në Kodin Zgjedhor më 5 Tetor 2020.

DEKRETI

Presidenti Meta dekreton kthimin për rishqyrtim në Kuvend të ligjit nr. 118/2020 – Arsyet e kthimit për rishqyrtim të ligjit
DEKRET

“PËR KTHIMIN E LIGJIT NR. 118/2020
‘PËR DISA SHTESA DHE NDRYSHIME NË LIGJIN NR. 10019, DATË 29.12.2008, ‘KODI ZGJEDHOR I REPUBLIKËS SË SHQIPËRISË’,
I NDRYSHUAR’”

Në mbështetje të nenit 85, pika 1 dhe të nenit 93 të Kushtetutës,

Dekretoj

Kthimin në Kuvend për rishqyrtim të ligjit nr. 118/2020 “Për disa shtesa dhe ndryshime në ligjin nr. 10019, datë 29.12.2008, ‘Kodi Zgjedhor i Republikës së Shqipërisë’, i ndryshuar”, sipas arsyetimit bashkëlidhur këtij dekreti dhe pjesë përbërëse e tij.

Nr. Dekretit 11797
Tiranë, më 22.10.2020

PRESIDENTI I REPUBLIKËS

ILIR META