Përplasjet me Presidentin/ Format e betimit, Edi Rama nis ndryshimet ligjore

Pas përplasjes primitive të Presidentit të Republikës për betimin e gjyqtarëve kushtetues, Edi Rama me mazhorancën janë në kërkim të gjetjes së një mekanizmi ligjor për të zhbllokuar situata të ngjashme nëse ndodhin në të ardhmen. Këtë e paralajmëroi vetë Kryeministri Rama gjatë fjalës së tij në seancën e jashtëzakonshme të Parlamentit, ku u miratua Rezoluta drejtuar Ilir Metës për ti dhënë fund shkeljeve të Kushtetutës.

“Ky Kuvend duhet të marrë masa ligjore kushtetuese, për të krijuar të gjithë mekanizmat zhbllokues ndaj çdo akti flagrant dhe brutal bllokimi të atij që zyrën e Presidentit e ka kthyer në një frëngji për të shantazhuar Parlamentin, për të shantazhuar ndërkombëtarët, për të shantazhuar popullin shqiptar. Në dritën e kësaj ngjarjeje të re, Komisioni i Ligjeve dhe gjithë deputetët, duhet të kontribuojnë për të riardhur këtu në Kuvend, më shpejt se vonë dhe për të votuar këtu neutralizimin e akteve të Presidentit, e akteve antikushtetuese dhe antiligjore,” tha Edi Rama nga foltorja e parlamentit.

Ndryshimet

Burime nga maxhoranca thanë se gjatë javës do të ulen ekspertët më të mirë të saj, pjesa më e madhe e të cilëve janë dhe anëtarë të Komisionit Parlamentar të Ligjeve për të propozuar mekanizmat zhbllokues ligjorë, që do të bëjnë të mundur funksionimin e institucioneve.

Formulat e betimit, raporton “Panorama” do të rishikohen në ligjet organike të Gjykatës Kushtetuese, të Prokurorisë së Përgjithshme por dhe të SPAK-ut, anëtarët e të cilëve pritet të betohen së shpejti. Për të shmangur ngërçin e krijuar, maxhoranca do të propozojë betimin e anëtarëve në institucionin që i ka zgjedhur, ose në atë të emëruar, nëse nga Presidenti i Republikës do të ketë hezitim, ose refuzim.

Ata dhanë dhe raste konkrete që mund të kthehen në ligj, si për shembull, kur anëtari i Gjykatës Kushtetuese refuzon të betohet para Presidentit të Republikës, ai e humb mandatin. Të tilla përcaktime pritet të bëhen edhe në rastet kur Presidenti i Republikës refuzon të pranojë betimin e një gjykatësi kushtetues, duke detajuar hapat konkretë se si situata në këtë institucion nuk shkon drejt bllokimit. Maxhoranca shprehet se nuk do të ndërhyjë në Kushtetutë, por vetëm në ligjet organike të institucioneve, ndërsa do të ketë edhe konsulencën e EURALIUS dhe OPDAT, të cilët monitorojnë në mënyrë të vazhdueshme legjislacionin shqiptar.