Pezullohet licenca e kompanisë së fluturimeve “Fly Ernest”

Enti Nacional i Italisë për Aviacionin Civil, ENAC, ka pezulluar licencën e kompanisë së fluturimeve “Fly Ernest”. Duke filluar prej sot, kësaj kompanie e cila operon edhe në Shqipëri, nuk i lejohet shitja e biletave.

ENAC sqaron se “Fly Ernest” do vijojë aktivitetin deri më 13 janar 2020 për shkak të biletave tashmë të shitura.

Pezullimi ka ardhur si pasojë e mosrespektimit të normativave evropiane nga kompania e fluturimeve.

“Fly Ernest” do të mbahet nën vëzhgim dhe do të monitorohet ENAC. Në rast se realizon kërkesat dhe normativat europiane pezullimi mund të hiqet.

Pas këtij vendimi të ENAC ka reaguar Autoriteti i Aviacionit Civil shqiptar duke i bërë apel qytetarëve të konfirmojnë statusin e fluturimit të tyre me kompaninë.

“ENAC vlerëson se lejimi i licencës deri në 13 Janar nuk rrezikon sigurinë në operim të kompanisë,” njofton AAC duke shtuar se kanë kontaktuar ENAC dhe se  pasagjerët e prekur nga “Fly Ernest” do të mbrohen.