Pizza franceze e Edi Ramës për Kosovën!
nga Agim Popoci
Pasi pushoi tallja me Edi Ramën dhe Samitin e Procesit të Berlinit nga leximi i dokumentarit, skenografia e shfaqjes së baletit e deri te shpërndarja e pizzave me surratin e Kryeministri të Shqipërisë, në Tiranë ia behu Presidenti i Francës, Emmanuel Macron, për të na treguar pse mungoi dje në Samit!
Vizat për Kosovën u pezulluan!
Ishte kjo pizza e fundit që Edi Rama e kishte rezervuar për Kosovën nga Samiti i Procesit të Berlinit, që pasi u bë publik nga Presidenti i Francës, Emmanuel Macron, shënoi dhe fundin e skenarit të Samitit që kishte hartuar Kryeministri i Shqipërisë i bindur se qesh mirë, ai që qeshë i fundit!
Të gjithë të tjerët që bukës i thonë bukë dhe ujit – ujë, që Amerikës i thonë liri dhe Rusisë vdekje, që Edi Ramës i thonë tradhtar dhe Albin Kurtit shqiptar, e kanë të qartë pse çdo gjë që ju vjen nga Franca është helm, dhe pse në përmendoren në shenjë falënderimit për Francën, në Kalemegdan të Beogradit shkruan:
E duam Francën, siç na ka dashur ajo neve!
Ndryshe, Presidenti i Francës, Emmanuel Macron, nuk do ta vinte në peshore Presidentin e Serbisë, Aleksandar Vuçiç, që refuzon Samitin e Procesit të Berlinit dhe shkon në Kinë për tu takuar me Putinin, dhe Kryeministrin Albin Kurti i cili i përulur për integrimin e Kosovës në BE mori pjesë në Samitin e Tiranës.
Presidenti i Francës, nuk do të kërkonte sot përgjegjësi nga Presidenti i Serbisë, Aleksandar Vuçiç që të dënojë aktin e 24 shtatorit, por, që të ekstradoj në Kosovë personin që e pranoi në Serbi se ka drejtuar grupin që ka kryer aktin terrorist, Milan Radoiçiç!
Presidenti i Francës, nuk do të kërkonte sot përgjegjësi nga Kryeministri i Kosovës, Albin Kurti, por do të kërkonte falje që e ndeshkoi BE sepse refuzoi të largonte forcat speciale të Policisë së Kosovës nga veriu ndërsa deklaronte se Kosova është e rrezikuar nga grupe te armatosura dhe trafikantë serbë, dhe më 24 shtator rezultoi e saktë!
Presidenti i Francës nuk do të kërkonte sot përgjegjësi nga autoritetet kosovare për zgjedhjet në veri të Kosovës, kur ato e kanë shpallur Udhëzimin dhe i ngelet Presidentit të Serbisë, atij që u tha serbëve të bojkotojnë zgjedhjet, nëse do të dalin në zgjedhjet e jashëtzakonshme që pritet të mbahen!
Presidenti i Francës nuk do të vënte në peshore Aleksandar Vuçiçin që organizon agresion mbi shtetin e Kosovës me një grup terrorist, dhe Albin Kurtin i cili u mbrojtë ashtu siç u mbrojtë Emannuel Macron në Arras!
Presidenti i Francës nuk do të kërkonte nga Albin Kurti krijimin e Asociacionit të komunave serbe kur ai është pjesë e Planit të cilin e ka hartuar vetë dora e Emmanuel Macron dhe Kryeministri i Kosovës ka pranuar ta firmos ndryshe nga Presidenti i Serbisë, Aleksandar Vuçiç që e ka cilësuar të papranueshëm!
Presidenti i Francës nuk do të kërcënonte as Presidenten dhe as Kryeministrin e Kosovës, si dy njerëzit më të votuar në zgjedhjet kosovare, duke i barazuar me Presidentin e Serbisë që nuk ka zhvilluar asnjëherë zgjedhje të lira dhe të ndershme, ndërsa ka në krah një hajdut votash si Edi Rama, që nuk njeh asnjë fitore elektorale në historinë e tij politike!
Dhe, në fund, Presidenti i Francës, Emmanuel Macron, nuk do të vënte në peshore Presidentin e Serbisë, Aleksandar Vuçiçin me orientim nga Moska, me Presidenten e Kosovës, Vjosa Osmani, dhe Kryeministrin Albin Kurti, që mbajnë kokën nga Perëndimi edhe kur hanë bukë, për ti dhënë fund kësaj drame duke menduar me aq ligësi sikur Edi Rama ose dhe kreativitet sikur dramaturgu i njohur francez, Jean Anouilh kur thotë:
“Gjithçka përfundon në Francë – gjithçka. Dasmat, pagëzimet, duelet, varrosjet, shpërqendrimet, çështjet diplomatike – gjithçka është një justifikim për një darkë të mirë.”
Sepse, thjeshtë, shqiptarët janë popull fisnik, i fjalës dhe besës dhe nuk i shkelin ato, dhe, siç e dinë për Kryeministrin Edi Rama nuk e thonë për Emmanuel Macron as pas këtij vendimi të pakuptimit për pezullimin e vizave për Kosovën:
Serbie, raison d’être!
