“Pjesëmarrje në seancat plenare”, Apeli i GJKKO shtyn seancën për Sali Berishën

Gjykata e Posaçme e Apelit për Korrupsionin dhe Krimin e Organizuar, GJKKO, ka shtyrë seancën ndaj Kryetarit të Partisë Demokratike, Sali Berisha, ku do të shyrtohej kërkesa për të marrë pjesë në seancat plenare të Parlamentit të Shqipërisë.

Avokati Genc Gjuokutaj tha për media se arsye e shtyrjes është mungesa e pjesëmarrjes së prokurorëve.

“Prokuroret munguan për arsye profesionale, seanca e rradhës datë 25 mars. Janë dy prokurorë, njëri prej tyre duhej të ishte prezent. U caktua një datë tjetër, 25 mars në orën 09:00 do të mbahet seanca e rradhës. Kërkojmë që Berisha të marrë pjesë në seanca plenare. Pa u rreshtuar politika në qëndrimin e saj këta nuk marrin pjesë,” tha avokati Genc Gjokutaj pas vendimit për shtyrjen e seancës.

Ndryshe, Kryetari i PD, Sali Berisha, apeloi vendimin e GJKKO-së së 8 shkurtit që nuk e lejoi të marrë pjesë në seancat plenare.

Kryetari i Partisë Demokratike, Sali Berisha, ndodhet në masën e sigurisë “arrest shtëpie” që prej 30 Dhjetorit në zbatim të një vendimi të Gjykatës së Posaçme. Avokatët e tij janë të bindur tashmë se ky vendim ka për qëllim djegien e mandatit të deputetit Sali Berisha.