Planet e Iranit, Presidenti Trump: Çdo sulm do të merr përgjigje 1.000 herë më të madhe!

Presidenti i Shteteve të Bashkuara, Donald Trump, tha se çdo sulm i Iranit do të merr përgjigje shumë më të madhe nga SHBA. Ky reagim vjen pas raporteve se Irani planifikon të vrasë një diplomate amerikane, për të marrë hak për vrasjen e gjeneralit iranian, Qasem Soleimani.

“Çdo sulm i Iranit, në çfarëdo forme, kundër Shteteve të Bashkuara do të kishte si përgjigje një sulm ndaj Iranit, që do të ishte 1.000 herë më i madh,” tha Presidenti Trump përmes rrjetit social Twitter.

Soleimani, komandant i forcës elitë Kuds të Gardës Revolucionare të Iranit, është vrarë në muajin janar, në një sulm me dron të SHBA në Bagdad.

Gazeta amerikane Politico raportoi më 13 shtator për një komplot të dyshuar iranian për të vrarë Lana Marksin, një mike e Presidentit Trump, e cila ka marrë postin e Ambasadores së SHBA në Afrikën e Jugut.

Duke cituar zyrtarë të paidentifikuar të Qeverisë amerikane, Politico tha se zyrtarët amerikanë kanë qenë në dijeni për një kërcënim të përgjithshëm kundër Marksit qysh në pranverë, por shtoi se kërcënimi është bërë më specifik javëve të fundit.

Nuk është e qartë se përse Irani do ta sulmonte atë.

Disa ditë pas vrasjes së Soleimanit, raporton RFE, Irani ka hedhur raketa balistike në një bazë ushtarake në Irak, që strehonte forca amerikane, duke iu shkaktuar lëndime traumatike të trurit dhjetëra ushtarëve.