Policia e Kosovës sekuestron armatim në Banjskë

Gjatë një patrullimi në fshatin Banjskë të Zveçanit, Policia e Kosovës ka sekuestruar armatim i cili është gjetur pranë një flamuri të Serbisë.

Në raportin 24-orësh, Policia thekson se gjatë patrullimit të datës 4 janar, ka gjetur dhe sekuestruar “një flamur të shtetit të Serbisë, 34-gëzhoja, një karikator të armës AK-47 dhe 689-fishekë kalibrash të ndryshëm” ndërsa e ka cilësuar rastin “armëmbajtje pa leje”.

Sipas Policisë, deri tani nuk ka persona të arrestuar lidhur me këtë rast ndërsa hetimet vazhdojnë.

Ndryshe, po në Banjskë, më 24 shtator një grup terrorist serbë i armatosur sulmoi Policinë e Kosovës dhe vrau rreshterin Afrim Bunjaku. Pas një shkëmbimi të zjarrit, mbetën të vrarë tre terroristë serbë.

Përgjegjësinë për sulmin e ka marrë Milan Radoiçiç, duke theksuar se ai personalisht” e ka organizuar sulmin dhe të gjitha përgatitjet logjistike, dhe se nuk kishte informuar askënd për ato plane. Kosova akuzoi Serbinë se qëndron pas këtij sulmi por Beogradi zyrtar e ka mohuar.